'Greenland Connect' iliorarneqalerpoq
Imaatigut kabeli 4780 kilomiiterinik isorartussusilik suliffeqarfiup Alcatel-Lucent Submarine Networks-ip sapaatiuppat juulip 20-anni immap naqqanut iliorarlugu aallartissavaa.
Katillutik umiarsuit sisamat suliamut peqataapput, siullerlu Canadami Newfoundlandimiit (Paggiivittaq) aallartissaaq. Umiarsuaq siulleq 'Blue Castor' Newfoundlandimiit aallarpoq sapaatiummat juulip 13-ianni, aallaqqaammullu immap naqqa kabelitoqqanik, aalisarnermi atortukunik, ujaqqanik allanillu kabelimut akornutaasinnaasunik salissallugu.
Tamatumap kingorna kabli immap naqqanut inissinneqassaaq, immap naqqata qaavanut iliinnarlugu imaluunniit assaallugu, suliarlu tamanna umiarsuarmit 'Mærsk Responder'-imit suliarineqassaaq. Taanna Newfoundlandimiit aallassaaq sapaatiuppat juulip 20-anni. Umiarsuit pingajuata 'Peter Faber'-ip ingerlaavartumik nakkutigissavaa aqqutaa sulinerlu tamarmik pissusissamisut ingerlanersut.
Umiarsuit sisamaat, 'Ile de Sein' Islandimiit ilioraalluni aallartissaaq aggustip aallartinnerani. Umiarsuit 'Mærsk Responder' aamma 'Ile de Sein' pilersaarutit naapertorlugit Qaqortumut Nuummullu tikissapput septemberip aallartinnerani, illoqarfiit taau maruk akornanni aqqut ikkussussallugu. Ikkussorneqareerpat immap naqqaigut kabeli, 'Greenland Connect'-imik atserneqarsimasoq, misiligarneqalissaaq.
Greenland Connect 2009-p kvartaliani siullermi atuisunit atorsinnaalissasoq TELE-POSTip naatsorsuutigaa. Attaviit 2008 naajartulerpat misilerarneqassapput, kablilu 29. december TELE-POST-imut tunniunneqassaaq.
- Umiarsuaq ilioraasussaq siulleq juulip 20-anni avalappat immaatigut kabeli pappiaqqatigut pilersaarutaajunnaarluni piviusumik attavilersuininngussaaq, TELE-POST-imi teknikikkut pisortaq, Jørn Jespersen oqarpoq.
'Greenland Connect' katillugit 750 millioner kr-inik akeqassaaq.