Errortorniupput
Erngup aqqutaanii qeritsaaliuinermi atuisartumut tunngasumi INI-p nassuiaataa Nukissiorfiup akuerinngilaa.
»Akiligassat Nukissiorfiit nassiuttagaat INI-p akisussaaffiginngilai»
Sermitsiap sapaatip akunerata siuliani allaaserisaata »Inip innaallagissamut nammineq kiligassani attartortunut akiligassanngortippai« kingorna A/S Inissiaatileqatigiit INI-mi aningaasaqarnermut pisortap Charlotte W. Nørregaardip tusagassiorfinnut nassiussaata qulequtaa taamak imaqarpoq. Suliami pineqartoq tassaavoq, illunit ilaqutariinnut inissianut ataasiakkaanut sanileriiaanullu erngup aqqutaata qeritsaaliorneranut innaallagiaq atorneqartoq.
- Ilumoorluinnarppoq akiligassanut taakkununnga akisussaasuunngimmat, nukissiorfimmi Nukissorfiit aningaasaqarnermut pisortaq Karsten Stounberg taamak oqarpoq.
- Kisianni eqqortumik inissiani immikkoortortaqarfinnut attaviliisarnerup attaveerutitsinissamullu nalunaaruteqartarnissaq INI-p akisussaaffigaa, taamaattumik suliami uani uagutsinnik akisussaatitsiniarnermik nipeqarpoq, aamma INI-p inissiaatileqatigiit immikkoortortaanni sorlerni erngup aqqutaanik qeritsaaliornerit sumiinneri nalunaarsortariaqaraluarpai.
Pineqartumi pisut sukumiinerusut aamma Sermitsiami atuakkit.