Nuup uuliasiorfiutileqatigiinnik pilerisaarinissamut periarfissarsiorpoq
Nuummi kommunalbestyrelsep ikaarsariarnermullu ataatsimiitsitaliap uuliasiorluni misissueqqissaarsinnaanissamut qalluilersinnaanissamullu Nuup aallaavittut umiarsualiviusinnaaneranut uuliasioqatigiiffinnik pilerisaarisinnaanermut periarfissat misissuataarsimavaat, nuuk.gl allappoq.
Kalaallit Nunaanni uuliasiorneq aallartillualerpat illoqarfik uuliasioqatigiiffinnut pilersuisussaq annertuumik suliassarpassuaqalissaaq. Kalaallit Nunaanni uuliamik qalluinissami nunap karsianut iluanaarutaanginnartussaanngilaq, kisiannili aamma illoqarfimmi pilersuiffiusumi inuiaqatigiinnut milliardikkaanik isaatitsissutaallunilu ineriartortitsinissamut annertuumik periarfissaqalersussaavoq.
Royal Arctic Line-p Danbor Service-illu aallartitaat Nuummi kommunalbestyrelsimik ikaarsaariarnermut ataatsimiitsitaliamillu ataatsimeeqateqarsimapput, uuliasiorluni misissueqqaarnissani uuliammillu qaluilersinnaanermi pilersuisinnaanissami Nuuk illoqarfittut aallaavittut uuliasioqatigiiffinnut pilerisaarutigisinnaanissaanut periarfissarsiorniarlutik. Danbor Service suliffeqarfiuvoq Nordsømi uuliamik qalluinermi kiffartuussisuusoq, Esbjergimi nunami sullifinnik arlalippassuarnik ingerlataqartoq.
Umiarsualivimmut illoqarfimmullu piumasaqaatit
Uuliasiorfiutileqatigiiffiit illoqarfimmut umiarsualiveqarfimmullu suliaminnut aallaavissatut toqqarniakkaminuut annertuumik piumasaqaateqarput. Umiarsualiviit soorunami pitsaasuussapput, naammattumik itissuseqassallutik talittarfiillu naammattumik takussuseqassallutik, sooruli illoqarfimmi attaveqaatit pitsaasuussallutik nunaminertanillu piareersimasuuteqassalluni, tamaani pequusiviit allallu sananeqarsinnaassallutik. Uuliasiorneq "Ikiuuttunik suliffeqarfinnik" peqarnissaanik piumasaqaatitaqarpoq, soorlu amutsiviit, napparsimmaviit, qalluiffinnut pilrsuisussat hotelillu.
Saniatigut aamma sulisussanik peqarnissaq pingaaruteqarpoq. Taamaattoq Dabor Service-imiit saqqummiisut erseqqissarpaat, sulisussat uuliasiornerup iluani ilinniarsimasuunissaat pisariaqanngitsoq, kisianni pissarsiarineqaannarsinnaanissaat pingaaruteqartoq.
Nuup iluaqutissartaasa ilagaat umiarsualivik sikuneq ajormat. Danbor Service Maersk-imit pigineqartup Royal Artic Line peqatigalugu sinerissami illoqarfiit assigiinngitsut tikeraassavaat, Kalaallit Nunaata imartaani uuliasiorfiutileqatigiitt siunissami kiffartuunneqarfigisinnaasaannut periarfissat misissuiffiginiarlugit. Kisianni tassa umiarsualivimmut pilersuinissamut aallaaviusummut tunngatillugu inaarutaasumik aalajangiisussat tassaapput uuliasiorfiutileqatigiit.