Arfanniarnermut tunngatillugu Lars-Emil Johansenip naalakkersuisut akerlerai
Lars-Emil Johansen naalakkersuisunut akerliulluni Atlantikup kujasissuani arfernik eqqissimatitsiveqarnissamut akuersaarpoq. Taanna iluaqutaasinnaavoq, Siumukkormioq folketingimi ilaasortaq taama isumaqarpoq
Silarsuarmi piviusut akerleriniaannarneqarsinnaanngillat.
Danmarki Atlantikup kujasissuani arfernik eqqissisimatitsiviliornissamut akuersisariaqarnersoq aperineqarami Lars-Emil Johansen, Siumut, taamatut akivoq.
Folketingip Avatangiisinut Pilersaarusiornermullu Ataatsimiititaliaa pingasunngormat ataatsimiimmat peqataavoq.
Folketingimi ilaasortap Siumukkormiuusup tassuunakkut naalakkersuisut akerlerigamigit nalunngilaa.
– Kalaallit Nunaata tassunga tunngatillugu isumaa 100%-imik isumaqatiginngilara. Uangali isumaqarpunga kalaallit arfattassinneqartarnerata qularnaarneqarnissaa eqqarsaatigalugu sulisariaqartugut, Lars-Emil Johansen oqarpoq.
Tikkuarpaa Kalaallit Nunaata tikaagulliit 200-it, tikaagulliusaat 19-it (+12) kiisalu arfiviit marluk tunnullillu qulit angorusukkai.
Kalaallit Nunaanni arfanniartarneq pitsaasumik paasititsissutigineqartariaqarpoq, folketingimi ilaasortaq oqarpoq tamannalu massakkut pingaaruteqartuunerarlugu.
– Uanga isumaqarpunga immitsinnut ajoqutaanngitsumik IWC-mi pitsaasumik isigineqalernissarput anguniartariaqaripput, Lars-Emil Johansen Sermitsiamut oqarpoq.
Sermitsiaq atuaruk.