Nasartaatit pillugit oqallinnerlusooq

Pisortat illuinik tuniniaasimaneq pillugu aalassassimaarneq allarluinnarnik naammaginngisaqarnermut ersiutaasimasinnaavoq, inatsisilerinermut professori oqarpoq.

Pisortat illusiaannut tunngasukkut uppernarsineqarporlusooq arlaatigut ajortumik ingerlatsisoqartoq, professori Hanne Petersen oqarpoq.

Pisortat illuinik tuniniaaneq pissusissat eqqorluinnarlugit igerlanneqarsimavoq. Københavns Universitetimi professori Hanne Petersen, siornatigut Ilisimatusarfummi ilinniartitsisuusimasoq taamatut oqarpoq. Kalaallit Nunaanni ilaquttanik kammalaatinillu saalliutitsisarneq apriilimi Københavnimi oqallissutigineqarmat taanna aamma ilaasimavoq.

Taamanerniillu advokatitigut misissuinerit marluk, pisortat illuinik tuniniaasimaneq pillugu inatsisartut naalakkersuisullu ingerlatsissimasaat, paasisassarsiorfigisimavai. Pingaartumillu advokatit suliffiata Poul Schmidtip misissuisimanera Hanne Petersenip maluginiarsimavaa.

- Tassani erseqqissumik takuneqarsinnaavoq namminersornerullutik oqartussat nalilittut pigisaat qularnaarniarlugit konjukturpant-imik taasamik aaqqissuussisoqarsimasoq, taannalu torrallataavoq, oqarpoq,

Konjukturpanti teknikikkut-aningaasaqarnikkut akip nioqqutiginninnermilu akip, attartortuunermiit-piginnittuunermut aaqqissuussineq malillugu illusisup illu ukiut qulit qaangiutsinnagit illu tunissaguniuk namminersornerullutik oqartussanut akiligassaata assigaa.

- Imaappoq illut ukiuni qulini pigineqaqqaartussaapput, oqaatigineqarnikuusutuullu iluanaarutiginiarlugit imaalitsiaannaq tunineqarsinnaanatik.

Tunissutaannaviunngillat

Hanne Petersenillu aamma illusisitsineq tunniussinertut oqaatigineqarsinnaasorinngilaa.

- Uangattaaq paasilluarnikuunngikkaluarpara, pissutsilli misissorluariarakkit oaasilerpara, konjukturpant-iliornikkut illut iluanaarniutigineqarsinnaanerat pinngitsoortinniarneqarsimasoq, oqartoqarsimagaluarneratuullu oqartoqarsinnaanngilaq pisortat politikerillu milliuunerpassuarnik tunineqarsimasut.

Hanne Petersenip malittarisassat attartortuunermiit piginnittuunermut aaqqissuussinermi tunulequtaasut iserfigiuminaatsuunerarpai, pisortallu illuinik tuniniaasimanerup paasiniaqqissaarneqarsimannginnera tupigusuutigaa.

– Poul Schmidtip misissuinera malillugu pisortat illui pitsaannginnerit nalinginnaasumik tuniniaasarnertorluinnaq tuniniarneqarsimapput, imaappoq pisortat akileraartartut aningaasaataat atorlugit akisuumik iluarsaassisitsinissaat pinngitsoorniarlugu iluarsaassinissarlu pisisussanit aningaasartuutigineqartussanngorlugu, Hanne Petersen oqarpoq.

Nasartaatit pillugit oqallinneq

Iluarinninnginnerlu allarluinnarnik peqquteqarsoraa.

- Danmarkimi nasartaatit pillugit oqallinneq qiviaannarsinnaavarput (mulismit pisortani suliffillit nasartaateqaqqusaanngillat, aaq.). Aperisoqarsinnaavoq ajornartorsiut allarluinnarmiinnginnersoq. Pisimasormi kalaallini inuiaqatigiini naammagittaalliuutissaqarneranut ersiutaavoq.

Hanne Petersenip misissuisoqarnera pitsaasutut isigaa, taamaaliornikkut apeqqutit iluamik paasisimanngisat qulaajarneqartarmata.

- Tassani takuneqarsinnaavoq inuiaqatigiit uukapaasiariinnarneqarsinnaanngitsut. Taamaattoqaraluarpat immaqa allaat tunngavissaqanngitsumik sakkortuumik pisoqalissagaluarpoq, tamannali politikerit sukkulluunniit piareersimaffigiuartariaqarpaat, taamaattumillu mianersoqqissaarnissaq pisariaqartuusarpoq.

Powered by Labrador CMS