Usuup puua isumannaatsumik atoqatigiinnermut isumannaallisaataanngilaq
Kunguaassiutitigut nappaateqalernianngikkaanni atoqatigisartakkat ikinnerpaatikkaanni isumannaanerpaavoq, svenskit nakorsaat ernisussiortuilu isumaqarput.
Kinguaassiutitigut nappaatinut akiuiniarnermi usuup puuata atornissaa kisimi naammanngilaq.
Tamanna svenskit aviisianni ullormut saqqummersartumi Dagens Nyheter-imi sapaammi saqqummersumi nakorsat ernisussiortullu arlallit aalajangersarpaat. Taakkua erseqqissarpaat, klamydiamik, hiv-imik atoqatigiinnikkullu kunguaassiutitigullu nappaatit siaruaanneqartartunik allanik tunillaassuinerup siammartinnginneqarnissaanut atoqatigisartakkat ikittuutinniarnissaat pitsaanerpaajusoq, politiken.dk sapaammi allappoq.
Nakorsat ernisussiortullu 12-it suliamikkut ajornartorsiummik ilsimasaqarluartut misissuineq nutaaq innersuussutigaat, misissuinermi tassani usuup puuanik atuisarnerup isumannaatsumik atoqatigiittarnermut nallersuussinerata ilumunnginneranut takussutissaasoq innersuussutigaat.
Taakkua oqaatigaat atoqatigisartakkat amerlassusiat oqaaqqissaarutaannartut pinnagu atoqatigiinnikkut paasititsiniaanermi sallerpaanngorlugu inissinneqarnissaa piffissanngortoq.
Sverigemi klamydiamik nappaateqalersartut maannakkorpiaq 50 %-imik amerliartorput, hiv-mik nappaateqalersartut 20 procentimi amerleriarsimallutik.
Kalaallit Nunaanni 2006-imi klamydiamik nappaateqartut 2.579-iusimapput, 2005-imi 2.713-iusimallutik. Kalaallit Nunaanni klamudiamik nappaateqarneq 2006-imi innuttaasunut 100.000-ikkaanut naatsorsuulugu 4.532-iuvoq, iamluunniit Danmarkimi 2006-imi innuttaasut 100.000-iugaangata taakkungannga 458-iusartunit quleriaammik amerlanerusut. Tamanna Peqqissutsimut qullersaqarfiup 2006-imut ukiumoortumik nalunaarutaani 2008-mi februaarimi saqqummiunneqartumi allassimavoq.