SIK: Namminersornermut aappi
Sulisartut kattuffiata namminersorneq pillugu isumaqatigiissummut novembarimi taasititsinissami angernissaq kaammattuutigaa. Namminersulivinnissamut aqqutissaavoq , SIK-p siulittaasua oqarpoq.
SIK ilaasortaani ukioq manna novembarip 25-iani namminersorneq pillugu taasinissami angeqqullugit kajumissaarpai. Namminersorneq kiffaanngissuseqalernissamut naalagaaffimmillu pilersitsinissamut aqqusaagassaavoq, SIK-lu isumaqarpoq tamanna Kalaallit Nunaata anguniartariaqaraa.
– SIK Kalaallit Nunaata kiffaanngissuseqalernissaa qasusuilluni uteriillunilu sorsuutiginiarpaa. Aamma kiffaanngissutsip nunap kalaallinit inuiannit aqunneqarlunilu ingerlanneqarnissaanik tunngaveqartumik inerlanneqassaaq, oqaatsillu pingaarnerit pisortatigoortumiussallutik (kalaallisut, aaqq.), SIK-p siulittaasua Jess G. Berthelsen AG-imut marlunngornermi saqqummersumut oqaaseqaammini aalajangersaavoq.
Taassuma Namminersornerullutik Oqartussat ataanni ukiut kingulliit 30-it "ajorpiang.."-itsutut taavai, piffissap taamak sivikitsigisup ingerlanerani Kalaallit Nunaanni ineriartornerup ilorraap tungaanut saatinneqarsimanera eqqarsaatigalugu. Pisoq inuiaat allat ukiut utritilikkaat arlallit artorlugit anguniartarsimasaat.
Jess G. Berthelsenip eqqaamaqquaa, Kalaallit Nunaat 60-ikkunni 70-ikkunnilu takornartanit navianartorsiorneqarmat peqatigitillugulu nunaqarfiit inuerusarneqarnissaat danskit pisortatigoortumik politikkerisimagaat.
– Namminersornerulernissamik isumaqatigiissut iluaqutigalugu naluneqanngitsutut ineriartorneq maanna ilorraap tungaanut saatinneqarsimavoq, taamalu kalaallit inuiaat inuianngoqqissimapput tulluusimaartut, Jess G. Berthelsen AG-mi allaaserisaqarpoq.