Grønlandsbankeni naalagaaffimmi mianersornerpaavoq

Naalagaaffeqatigiiffimmi tamarmi aningaaseriveqarfinnit 60-iusunit Grønlandsbankeni aningaasanik atukkiinissaminut mianersornerpaajusoq misissuinerup takutippaa.

Misissuineq nutaaq Jyllands-Postenimut suliarineqarsimavoq. Taassuma takutippaa Kalaallit Nunaanni, Savalimmiuni Danmarkimilu aningaaserivinnit misissuiffigineqartunit 60-iusunit Grønlandsbankeni tamanit mianersornerpaartaajusoq, AG allappoq.

Pointilersuutip bankit annaariaannarnik qanoq atukkeerusussinnaanerannut uuttuutip takutippaa Grønlandsbankeni 13 pointiinnarnik pissarsisimasoq. Banki annaariaannarnik atukkeerusussuseqarnerpaaq tassaavoq Århus Lokalbank-i 219 pointinnattoq. Qallunaat bankii angisuut Nordea aamma Jyske Bank tamarmik 100 pointit sinnerlugit pointinnapput.

Grønlandsbankenip inuinnarnut sullissiviani direktøri Thomas Elgaard naapertorlugu, banki mianersortumik periuseqarluni ingerlatsivoq, kalaallit nunaanni aningaasaqarnikkut ingerlaneq sanngiitsuummat, aamma banki peqqissumik aningaasaqarnikkut ineriartortitsinissamut peqataarusuttuuvoq, inuit illuminnut attartukkaminnik utertitsisinnaajunnaarnerat pissutigalugu pinngitsaaliissummik anisitsiortuinernik pisoqaleriataassanngippat.

Powered by Labrador CMS