INI-p kukkuneq utoqqatsissutigaa
Inuup kukkuneratigut allakkat inuit atiisigut taasat akiitsui akiligassaallu kinguaattorutit Saattuni innuttaasunut tunniussuunneqarsimapput. Tamanna INI-p ajuusaarutigaa utoqqatserlunilu.
Nunaqarfimmi Saattuni innuttaasut paasivaat inissiaatileqatigiit INI A/S-ip akiligassat akiitsullu nunaqarfiup innutaanut tamanut saqqummiussimagai. Ullup-qeqqanut radioaviisimi INI kommunalbestyrelsemi ilaasortamit Apollo Mathiassenimit sakkortuumik isorineqarpoq.
- Allakkani inunnut ataasiakkaanut tunngasunut aningaasat atukkat, akiligassat akiligassallu kinguaattorutit takuneqarsinnaapput. Pappiaqqanik inunnut ataasiakkaanut tunngasunik Saattuni innuttaasunut tamanut agguaassisimanerat ajorluinnaqqissaarpoq, Apollo Mathiassen KNR-imut oqarpoq, nangillunilu:
- Tamanna isumakkeerfigineqarsinnaanngilaq aamma tamanut nittarsaassineroreermat.
Inissiaatileqatigiit kukkuneq nassuerutigaa, narrutsassimaarnerlu paasisinnaalluarlugu. INI-ip oqaatigaa tamarmik utoqqatsissutitalimmik allaffigineqassasut.
– Illuutillit tamarmik tamatuminnga eqqorneqartut pisut pillugit allakkatigut utoqqatserfigineqassapput, taamalu nammineq illuliornermut immikkoortortaqarfiup kukkuneq isumakkeerfigiuminaatsoq pisimammat assut ajuusaarutigaa. Illuutillit kukkuneq isumakkeerfigineqarsinnaanngitsuunerarmassuk paasisinnaavagut, qisuariarnerallu paasisinnaalluarlugu, INI A/S-ip tusagassiorfinnut nalunaartutaanni allassimavoq.
Allakkani nassuiaataavoq, ukioq manna illuutillit tamarmik allakkiorfigineqarsimasut, tassuunakkut ilisimatinneqarlutik nammineq illuliatik pillugit tikeraarneqarlutik siunnersorneqarnissamik ilitsersorneqarnissamillu neqeroorfigineqarniartut. Kisianni allakkat taakku sapaatip akunnerata naaneeranni kingullermi Sisimiuniit Uumannami INI-mut nassiunneqarmata inuup annertuumik kukkunera pivoq. Tassami allattorsimaffik illumik piginnittup aqqanik B.nr.-mullu allassimanerata saniatigut allattorsimaffik tapiiffigineqarluni illuliamut atukkanut atatillugu akiitsut akiligassallu kinguaattoorutaasimasinnaasut pillugit paasissutissartallit langunneqarsimapput.
– Kinaluunniit imminnut oqarfigisimasinnaagaluarpoq, akiitsut sinneruttut akiligassallu kinguaattoorutit soorunami peerneqarsimasussaagaluartut aammalu B-.nr.-t allattorsimaffiat nunaqarfinni allaffiit allakkanik agguaassilerunik illup iluani taamaallaat atugassaasoq, immikkoortortaqarfimmi aqutsisoq Birte Kielsen INI-mit tusagassiorfinnut nalunaarummi allappoq.
Taamaakkaluartoq allattorsimaffik allakkallu nunaqarfinni allaffinnut nassiunneqarsimapput. Immikkoortortaqarfinni aqutsisoq naapertorlugu nunaqarfinni allaffiit Saattut eqqaassanngikkaanni allakkat nassiunneqartut qisuariaateqarfigisimavaat, allagassiunneqartinnagillu agguaanneqartinnagilluunniit paasissutissallu aningaasanut tunngasut peersimallugit. Ulloq taanna sukumiineusumik paasiniaanerup takutippaa, paasissutissat taakku Saattuni illunit 52-iusunit illunut 12-inut tunniunneqarsimasut, tamatumalu kingorna kommunalbestyrelsemut ilaasortap aamma illuutiliusup kukkuneq oqaatigisimavaa, tusagassiorfinnut nalunaarummi nassuiaatigineqarpoq.