Qilalukkat pisat 48-t - tuugaat kisiisa tigullugit
Ittoqqortoormiit eqqaanni umiarsuarmik takornariartaammik takornariat nalaatsornerinnakkut qilalukkat qernertat 48-t pisarineqarsimasut nassaaraat, taamaallaat tuugaat neqiminerlu mattaminerlu tiguneqarsimasut.
Taamatut Sermitsiaq paasisaqarpoq.
Aviisip paasisai malillugit pisimasoq illoqarfimmi politiinut nalunaarutigineqarsimavoq. Sulili nalorninarpoq kina politiinut nalunaarutiginnissimanersoq nalunaarutiginnittorlu qanoq isumaqarnersoq inatsit suna unioqqutinneqarsimanersoq.
Qilalukkat qernertat augutsip 17-ianni 2008 Ittoqqortoormiinit 50 - 100 kilometerinik kujasissusilimmik nassaarineqarput.
Takornariat umiarsuarmut takornariartaammut "Polar Pioneer"-imut ilaapput, australiamiut selskabiannit Aurora Expeditions pigineqartumut.
Ittoqqortoormiini politiit sapaatiummat unnukkut pisimasoq oqaaseqarfigiumanngilaat.
Kalaallit Nunaata Kitaani Avannaanilu qilalukkanik qernertanik pisassiisoqartartoq Tunumi qilalukkanik qernertanik pisassiisoqarneq ajorpoq.
Qilalukkat tuugaavi nalinginnaasumik naleqarluartuupput. 2006-imilu junimiilli qilalukkanit qernertanit tunisassinik avammut tuniniaaneq inerteqqutaasimavoq. Nunat EU-mut ilaasortat 2004-mi decemberimi aalajangerput qilalukkanit qernertanit tunisassianik eqqussuineq inerteqqutaalissasoq.