Danmarki arferit pillugit suleqatigiissitami peqataasoq
Danmarki suleqatigiissitaliamut nunanit 20-init peqataaffigineqartumut ilannguppoq. Suleqatigiit ukiuni tulliuttuni arferit angisuut pisarineqartarneri illersorneqarnissaalu oqallisigisassallugit sisamat-tallimariarlutik naapittartussapput.
Qallunaat arfanniarnermut kommissæriat Ole Samsing Chilep illoqarfiisa pingaarnersaanniit Santiagomiit ilisimatitsivoq, tassani nunat tamat arfanniarnermut ataatsimiitsitaliarsuata IWC-p ukiumoortumik ataatsimiinnini ataasinngornermi ammarpaa. Suleqatigiissitaq arfanniarnermut ataatsimiitsitaliarsuarmi avissaartuuffioqisunngorsimasumi tatiginnilersitsinissamik pilersitsiniarnermik suliaqartussaavoq.
- Arfernut eqqissisimatitsiviliornissap Kalaallit Nunaatalu arfattassinneqarnissaasa saniatigut uagutsinnut pingaaruteqarpoq, ataatsimiinnermi matumani suleqatigiiffimmik eqqissisimanerulaartumik ingerlatsiviusumik toqqammavissiuinissaq. Taamaattumik suleqatigiissitaliamik aallartitsisimavugut. Uagutsinni suulluunniit oqallisigineqarsinnaapput, Ole Samsing oqarpoq.
Qallunaat isumaqatigiinniartuat naapertorlugu nunat tamat akornanni suliniaqatigiiffiup atatiinnarneqarnissaa taakkulu pillugit oqallittareqartuarnissaa arfernut iluaqutaanerpaavoq. Qallunaat naalakkersuisuisa IWC-ip atorunnaarsinneqaratarsinnaanera ernumanartoqartippaat, arfanniarnermik illersuisut soorlu Japan, Norge aamma Island ilaasortaajunnaarniarlutik sioorasaaruteqarmata.
Suleqatigiissitaliaq nutaaq IWC-p ilaasortaaneersunit 20-init ilaasortaaffigineqarpoq.