Sukkortut suli amerlapput
Diabetes 2 suli atugaaqaaq, pingartumik utoqqaanerusuni. Amerlasuut sukkornerlutik naluagaat misissuinerup takutippaa.
Kalaallit Nunaanni innuttaasunik qanittukkut misissuinerup uppernarsarpaa, sukkornerup type diabetes 2-o atugaani annertuujusoq. Taamak Kalaallit Nunaanni peqqissutsikkut ilisimatusarfik allappoq. Taamaalilluni kalaallit nunaanni ungasinngiotsukkut misissuinerup kisitsisaatai apeqqusernearput, misissuinermi tassani inuit 40-t sinnerlugit ukiullit taamaallat 2 procentii diabetes 2-mik nappaateqartut. Misissuinerup 1999-imeersup takutippaa kalaalit nunaata innuttaasa 10 procentiisa missaanniittut sukkornermik nappaateqartut.
2005-2207-imut innuttaasunik misissuinerup takutippaa, kalaallit inersimasut 8 procentii sukkornermik nappaateqartut, saniatigullu suli 19 procentit sukkulernissamut ilisarnaatinik nappaateqartut. Sukkornermik nappaateqartut 28 procentiinnaat siumut ilisimaneqareersimapput, sinneri aatsaat misissuinermut atasumik timip sukkoqassusianik misissuineq ingerlanneqarmat paasineqarput.
Inunnit sukkornermik nappaatilinnit 159-iusunit taamaallaat 44-it (28%) sukkornermik nappaateqarnertik nalunngereerpaat - kisitsisit nunani killerni misissuinernit taamaattunit malunnartumik appasinnerusut. Kalaallit Nunaanni inuit utoqqasaanngulersut utoqqaanerusullu akornanni sukkornerup takussaanerujussua peqqinnissaqarfimmut ukiuni tulliuttussani annertuumik unamminartorsiorfiussaaq, taamak Marit Eika Jørgensen, 1 reservelæge ph.d. aamma Peter Bjerregaard, professor dr.med., Kalaallit Nunaannit Peqqissutsikkut Ilisimatusarfimmeersut, misissuinermut atatillugu erseqqissaapput.
Sukkorneq 60-ikkunni Kalaallit Nunaanni takussaangingajalluinnarsimavoq. Taamaattumik 1999-imi Kalaallit Nunaata Kitaani immikkoortuni pingasuni innuttaasunik misissuinerup 10 %-t missaanniittut sukkornermik nappaateqarnerat paasineqarmat tupaallaataavoq. Sukkornermik nappaateqarnerup sukkasuumik atugaalernera inuiaqatigiinni allanngoriartupiloornerit sananeqaatinut tunngasutigut allannguuteqarnermik ilallugit peqqutaasimassangatinneqarput. qangatuunerusoq piniartuunermiit nunani kitaamiuni inooriaatsimut assingunerusumut ikaarsaariarnermi nerisatigut allannguuteqarnermik malitseqarsimavoq, timimik atuineq annikinnerulersimavoq, pualasuullu amerliartupiloorlutik.