Ilulissat kangerluannit ulloq naallugu assit nutaat
Inuit nunarsuarmit tamaniittut maanna Ilulissat saavani iluliarsuit malittarisinnaalerpaat - illoqarfiullu umiartsiaararpassui kutterillu umiarsualivimmiit aallarartut tassungalu tikittartut malinnaaffigisinnaallugit.
Hotel Arctic-ip sapaatip akunnerani uani hotelip internetimi nittartakkani nutaaq ilisaritippaa, nutaarsiassanullu ilaavoq webcam-i kangerlummut sammisoq.
– Hotelimiit kangerlummut iluliarsualimmut isikkivik tupinnaqaaq, taannalu kikkunnulluunniit internetimut attavilinnut avitseqatigiissutigerusupparput, pisortaq Erik Bjerregaard oqarpoq. Taassuma naatsorsuutigaa assinik nutaavinnik taarseraattuartunik takutitsisarnerup Kalaallit Nunaanut Ilulissanullu tikeraarnissamut soqutiginninneq annerulersikkumaaraa.
Kamerap isikkivik hotelimi inississimasut takusartagarpiaat takutippaa. Kamera init arlaanni ilagaanut inissinneqarsimavoq.
– Maannakkuugallartoq assit minutsit tallimakkaartumik taarsertarpagut, kisianni Telep atlantikup naqqagut kabelertaassaa atorlugu Ilulissani bredbåndi annertuneq atorneqalerpat stream video-mik neqeroorsinnaalernissarput, Erik Bjerregaard ilisimatitsivoq.
Internetimi nittartakkami nutaami kalaallisut, qallunaatut tuluttullu oqaasertalimmi Hotel Arctic-ip paasissutissat siornatigornit amerlanerusut neqeroorutigai. Init assigiinngitsut tamarmik nassuiaatitaqarput, neriniartarfimmi suut nerisassaanersut viinnillu suunersut allassimapput, ataatsimeersuartitsinermi atortut, kangerlummik ilisarititsineq, sulisunik ilisaritsitsinerit aammalu sulisussarsiornernut alagassiussat. Hotelip nutaarsiassaateqarfia assigiinngitsunut inniminneerneqarsinnaavoq, soorlu immikkoortoq paasissutissanik imalik Ilulissanilu innuttaaasunut neqeroorutinik.
Hotel Arctic-ip website-a nutaaq uani adresseqarpoq: www.hotelarctic.com