Uummannami Freuchenip illua katersugaasivittut
Atuakkiortup Peter Freuchenip illuata Dundasimi Uummannami eskimuut nunaqarfitoqaanniittup katersugaasivinngortinneqarnissaa siunnersuutigaa.
Ukiut marluk qaangiuppata Knud Rasmussenip Peter Freuchenillu eskimuut nunaqarfitoqaata Uummannap niuertoruseqarfinngortinneraniit ukiut 100-nngussapput. Niuertoruseqarfik nutaaq Thulemik atserpaat, taannalu Knud Rasmussenip Thulemut ilisimasassarsiornerani tusaamasami tunngavilerneqarpoq. Peter Freucheni 1910-mi niuertoruseqarfimmi Thulemi naalaganngorpoq, tassanilu nuliani Navarana ilagalugu illoqarlutik.
Illuat oqaluttuarisaanermut pingaaruteqarpoq kingulissatsinnullu tammatsaalisassatut pingaarluni, taamak atuakkiortoq ilisimasassarsiornerilu aqutsisoq John Andersen isumaqarpoq. Taamaattumik Peter Freuchenip illuata takornarianut Pituffimmilu sakkutooqaarfimmi sulisunut iluaqutaasussanngorlugu iluarsaanneqarnissaanut aningaasaliisussarsiorniarpoq.
– Kalaallit Nunaanni illut oqaluttuarisaanermut pingaarutillit amerlanngillat. Isumaqarpunga, illu una kalaallit qallunaallu oqaluttuarisaanerani oqaluttuartuusoq, John Andersen sermitsiaq.gl-imut oqarpoq.
Siullermik aasaq manna Uummannamut aallassaaq illu ajoqutaanik amigaatigisaanillu nalunaarsussallugu, aammalu iluarsaanneqarnissaanut aningaasartuutissat missingersuusiorfigissallugit, iluarsaannissaanullu aningaasaliisinnaasussarsiorniarluni.