Ivittuuni aqerlumik mingutsitsineq minneruvoq
Ivittuuni orsugiassiorfiusimasup eqqaani uilluni sulluitsunilu aqerloqassuseq ukiut 25-t ingerlaneranni annikilleriarsimavoq, 1982-imi mingutsitsinermik nakkutiginnilernernermiit pingajuat avillugu annertutigisumik annikillisimalluni.
Tamanna Aarhus Universitetimi Danmarkimi Avatangiisinik Misissuisoqarfiup (DMU-p) Ivittuut eqqaanni avatangiisinik misissuinerit pillugit nalunaarutaani takuneqarsinnaavoq.
Aatsitassanik qalluiffimmi ujaqqanik immikkoortiterinermut atatillugu aqerlumik zinkimillu mingutsitsinermut aallaaviusut mingutsitsineq pilerpoq, ujaqqat sineriammi atorneqarsimapput.
Kisianni uillut Ivittuut eqqaanni sinerissamik 5 kilometerinik isorartussusilimmi suli ima aqerlortaqartigaat, nerineqarnissaat inerteqqutigineqarluni.
Aqerlumik zinkimillu mingutsitsinerup qanoq ingerlanera DMU nakkutigaa, taamalu uilluni sulluitsunilu zinkeqassuseq aamma annikilleriarsimalluni, kisianni aqerloqassutsitulli annertutiginngitsumik.
Arsuup kangerluani Ivittuuni aatsitassamik piiaaneq 19854-imiit 1987-ip tungaanut ingerlanneqarpoq. Malmi piiaaffimmit ammasumit piiarneqarpoq, immikkoortiterneqarluni umiarsuamillu avalaanneqartarluni. 1982-imi avatangiisinik misissuinerup takutippaa, Arsuup kangerlua aqeerlumik zinkimillu mingutsinneqarsimasoq.
Mingutsitsinermi mingutsitsinerpaaq tassaavoq orsugiak annikitsuinnarmik orsugiattalik atugassaanngitsutut immikkoortitaq ukiorpassuillu ingerlaneranni Ivittuut eqqaani sineriak atuarlugu nunniornermut atorneqartarsimasoq. Nunniuutigisarsimasaq taanna aqerlup zinkillu mineraliisa sinnerinik akoqarpoq, taakkulu aqerlumik zinkimillu kangerlummut aniatitsisimavoq, ulittarnerata ullup unnuallu ingerlaneranni marloriarluni sineriak atuarlugu nunniuutikut orsugiattallit angugaangagit.