Sisimiuni aliikkusersuinerpassuit
Sapaatip akunnerata ingerlanerani ingerlanneqarput isiginnaartitsineq, nipilersorneq, saqqummersitsineq upernaakkullu tusarnaartitsineq
Sisimiut kulturikkut illorsuat, Taseralik, sapaatip akunnerata ingerlanerani kulturikkut pisoqarfiusorujussuusimavoq.
Sisamanngornermi majip 22-ianni Knud Rasmussenip Højskoliani ilinniartut isiginnaartitsillutik, nipilersorlutik saqqummersitsillutillu takutitsipput.
Ilitsersuisoq N ikku Olsen qulliit qalipaatillu atorlugit isersimasunik tiguaalluavippoq. Nikkup isiginnaartitsisartuittut pinissaq anguniarneqarsimannginnerarpaa, ilinniartulli højskolemiinnerminni ineriartornissaat eqqarsaataasimanerarlugu.
Arfininngornermi majip 24-ianni Sisimiuni Nipilersornermik Ilinniarfimmi ilinniartut siullermeerlutik Taseralimmi upernaakkut tusarnaartitsipput. Tusanaartitsineq nalunaaquttap akunnera missiliorlugu sivisussusilik assigiinngitsorpassuarnik imaqarpoq, qangatut nipilersornermiit nutaaliaasumik nipilersornermut.