Pisiffimmi sulisut pikkorissartut
Pisiffik upernaaq maanna illoqarfinni arfinilinni ingerlataqartitsivimmini tamani sulisuminik ineriartortitsilluni pikkorissartitseqattaarsimavoq.
Sulisut katillugit untritillit arlallit ulluni marlunni pikkorissartitseqattaarnerni peqataasimapput, Pisiffiup nammineq HR-imi immikkoortortaqarfianit ilitsersuisuinit ingerlanneqartuni. Pikkorissarnerit kalaallisut ingerlanneqarsimapput peqataasullu siunissami ulluinnarni atugassaannik atortussanik arlalinnik pissarsisissimallugit. Pikkorissarnerni qulequtaasimavoq "Pisisartunik kiffartuussineq" aamma "Suleqatigiinneq", aammalu soorlu puullaaqqinerup iliuuseqarfiginera, sullivinni avatangiisit pitsaasut, akaareqatigiinnerlu sammineqartarsimapput, taamatut paasissutissiivoq Pisiffimmi HR-imi pisortaq Søren Olsen Damgaard.
– Pisiffiup pikkorissartitsinerit sulisullu piginnaasaasa pitsanngorsarnissaat sammisorujussuuvaa. Taamaasilluni upernaaq manna pikkorissartitsinerit ukiuni kingullerni pikkorissartitsisarnerparujussuit nanginneraat. Sulisut amerlaqisut, qullersat qullersaanngitsullu, sammisani assigiinngitsorujussuarni pikkorissartitseriaatsini assigiinngitsorpassuarni pikkorissartitsinerni piginnaasanillu annertusaanerni peqataasarsimapput. Ilaatigut taaneqarsinnaapput: Coachingimik pikkorissarnerit, teambuilding, inuttut ineriartorneq, pisisartunik kiffartuussineq, suleqatigiinneq, nassaarniarnermik pikkorissarnerit, aningaasarsiornermik pikkorissarnerit, IT-mik pikkorissarnerit aammalu allaffissornermik pikkorissarnerit, Søren Olsen Damgaard oqarpoq.