Naalakkersuisut: Marie Fleischer-ip oqarnera ilumuunngilaq
Ilulissani juunimi, juulimi aggustimilu SAR-imi upalungaarsimasuutitaqarneq matoqqassanerarlugu Inatsisartunut ilaasortap Marie Fleischerip oqarnera ilumuunngilaq.
– Qeqertarsuup tunuani SAR-imi upalungaarsimasuutitaqartoqarpoq, Namminersornerullutik Oqartussat nalunaarput.
– Pissutsit imaapput, qulimiguulik S-61 decembarimiit maajip qeqqanut Ilulissaniitinneqartoq ukiup siulianisuulli juunip naanerata tungaanut pilersaarutaasumik aserfallatsaaliineq pissutigalugu Ilulissaniinngikkallarmat. Taamaattumik qulimiguulik S-61 juulip aallaqqaataaniit Ilulissaneeqqilertussaavoq.
– Tamannali isumaqanngilaq Ilulissani SAR-imi upalungaasimasoqanngitsoq. SAR-imi kiffartuussinermi qulimiguulik S-61 kisimi isumalluutigineqanngimmat paasissallugu pingaaruteqarpoq. SAR-imi upalungaarsimasuutitaqarnermi atorneqartartut tassaapput qulimiguullit nalinginnaasumik ilaasunik angallassinermi attartortitsinermilu atorneqartartut kiisalu umiarsuit alapernaarsuutit qulimiguulinnik atortullit, angallatit alapernaarsuutit, politiit angallataat, umiarsuit inuinnarnit pigineqartut kiisalu umiarsuit annaassiniartartut allat.
– Air Greenland aasaanerani qulimiguulinnik mikinerusunik arlalinnik attartortagassanik ujaasisoqartussanngornerani atorneqartussanik Qeqertarsuup tunuaniititaqarpoq, Naalakkersuisut Siulittaasuata Allattoqarfia nalunaarpoq.