Uumasut nakorsaasa pisortaat aallalerpoq
Ukiuni arfineq marlunni uumasut nakorsaasa pisortaattut sulereersimalluni Lasse Holm Danmarkimut utertussanngorpoq.
Nuummi uumasut nakorsaasa pisortaattut atorfik pissanganartorujussuuvoq, Lasse Holm Danmarkimut utertussanngortoq oqarpoq.
Suliassaasa ilagisimavaat inuussutissaleriffinnik akuersissutiginnittarneq, EUp peqqussutai malillugit isumaqatiginninniartarneq aammalu qimminik qitsunnillu kinguaassiorsinnaajunnaarsitsisarneq. Allaat ullup ataatsip ingerlanerani.
- Danmarkimi uumasut nakorsaannik taamaaliortoqartarunanngilaq, Lasse Holm inuussutissalerinermut qullersaqarfiup nakkutilliineranut pisortaajartorluni ilaquttani ilagalugit Odensemut nuuttussanngortoq oqarpoq.
Uumasut nakorsaasa pisortaata suliassat qimuttunut uumasunillu naalliutsitsisarnermut tunngaasut aamma ukiuni kingullerni ulapputigisarsimavai.
Tamakkua isiginiarneqarnerusalernerat ulapititsisuusarsimavoq, Lasse Holm namaminesornerullutik oqartussat suliakkertarsimasaat taama isumaqarpoq.
- Kalaallit Nunaanni takornariaqarfinngorsimavoq. Uumasullu pitsaasunik atugaqarnissaat tappiffigineqarnerulersimavoq, Lassde Holm oqarpoq.
Nuummili uumasut nakorsiartarfianni angerlarsimaffinni qimmerpassuarnik takusaqartarsimavoq. Ataasiakkaat nerisakilaarpallaartarsimasut, inuit uumasuutimik nerisinnissaat eqqarsaatiginagu imerpallaartarsimammata. Silarsuarmili sumiluunniit taamaattoqartarpoq, Lasse Holm tikkuaavoq. Ajornartorsiulli allarluinnaavoq.
- Nuummi qimmit pualavallaartut saluppallaartuniit amerlanerujussuupput, Lasse Holm oqarpoq.
Lasse Holmip Kalaallit Nunaanni uumasut nakorsaasa pisortaattut taartissaanik suli nassaartoqarsimanngilaq. ?Atorfinitsitaasa kingulliit ilagaat Pia Cordt Olsen, junip aallartinnerani Nuummut tikittoq, Kalaallit Nunaanni uumasut nakorsaattut ilinniarsimasut siullersaat.
Sermitsiaq atuaruk.