NunaFonden aningaasaliivoq

NunaFonden-p 7.696.000 koruunit agguaappai

Kalaallit Nunaanni Taekwon Do-tartut kattuffiat NunaFonde-miit 1 million koruuninik tunisippoq.

NunaFondenip siulersuisui ataatsimeeqqammerput.

Tassani pingaartumik Assammik Arsartartut Kattuffiat aamma Kalaallit Nunaata Taekwon-Do-mik unammisartui tamarmik immikkut ukiunut marlunnut 1,0 mio. koruuninik aningaasaliiffigineqartut taaneqarsinnaapput, tassalu 500.000 koruunit 2008-mi atugassat aamma 500.000 koruunit 2009-mi atugassat, NunaFonde nalunaarpoq.

PLF-Nuuk (angajoqqaarsiat peqatigiiffiat), Ellen S. Chemnitz-ip siulittaasuuffigisaa Nuummi isumasioqatigiinnissap NOFCA-mik taaneqartup 2008-mi septembarimi ingerlanneqarnissaanut 100.000 koruuninik aningaasaliiffigineqarpoq.

Nipilersorlutik isiginnaartitsisartut ”Malugisarpara”, Pipaluk Kreutzmann Jørgensen-imit aqunneqartut 2008-mi ukiakkut Tasiilamut, Narsamut, Qaqortumut, Sisimiunut, Ilulissanut, Aasiannut Maniitsumullu angalaarnissaminnut 120.000 koruuninik tapiiffigineqarput.

Isiginnaartitsisartut Silamiut “Eskimuut pillugit oqaluttuat” tuluttut oqaasertaqartup Nuummi umiarsuarni takornariartaatini isiginnaartitsissutigisarnissaanut, aamma angalaarlutik “Gi mi tiggum”-ip isiginnaartitsissutigisarnissaanut 250.000 koruuninik, aammalu angalaarlutik “Macbeth”-ip isiginnaartitsissutigisarnissaanut 100.000 koruuninik tapiiffigineqarput.

Annikinnerusunik aningaasaliiffigineqartuni Bolethe K. Heilmann, Maniitsmi Atuarfik Kilaaseeqqami ilinniartitsisoq taaneqarsinnaavoq, taannalu 2008-mi juunimi meeqqanik ADHD-mik nappaatilinnik tallimanik misigisassarsiortitsilluni angalatitsinissaanut 20.000 koruuninik tapiiffigineqarpoq.

Saqqami Katersortarfilerisut nerrivinnik issiavinnillu aserfallassimasunik taarsersuinissamut 25.000 koruuninik tapiiffigineqarput, tunissutinillu minnernit taaneqarsinnaasut allat tassaapput Aappilattumi Inuusuttut Ingerlariaqqiffiat, najukkami meeqqat atuanngiffeqarnerminni nunaqarfiup avataanut angalanissamut periarfissaqanngitsut aallaaqatigiinnissaannut 6.000 koruuninik tapiiffigineqartoq, kiisalu Sermiligaami Fritidsklubbi, inuusuttunik Tasiilamut bordtennis-imik unammiartortitsinissamut 30.000 koruuninik tapiiffigineqartoq.

Aningaasaliissutit allattorsimaffiat tamakkiisoq www.nunafonden.gl alakkarlugu takuneqarsinnaapput.

Powered by Labrador CMS