Nanorsuarooq

– Telefuuni sianerpoq oqarfigineqarpungalu »Hvalrosbugtip illuatungaani nannumik takusoqarsimavoq!« Paatsiveerusimaarnaq – uannut. Puullaaqilerpunga, qanormi ilillunga snescooterimik pissarsissaanga (qujanartumilli pissarsinngilanga), taava napparsimmaviup tungaanut arpalerpunga. Unikkiartornanga, kisianni taakanngaanniit kangerluup tungaanut isikkiviginnerummat. Taakunnartillunga suli allat marluk sianerlutik nannumik takusoqarsimaneranik oqaluttuuppaannga. Inortuissangajunnaarpunga. Napparsimmavik tikilerlugu naapippara angut utoqqaq eqqisseqqissaarluni pisorujoortoq, taannalu unippoq oqaloqatiginialerlungalu. Nipituumik (nalunartut pillugit) oqarfiginasuarpara, kangerluup illuatungaani nannumik takusoqarsimasoq tusarsimagiga. Inussiarnerpaluttumik qungujulalluni niaquinnarminik angerpoq tikkuarlunilu: »Aap, qimussinik sisamanik taakunnartoqareerpoq«. Angorniunngilarlluunniit. Nannunik takujuartarsimagunarami. Uangali suli nannumik takunikuunngilanga! Qimmitut nanorsilersutut ippunga. Ulapeqaanga, malinniarpara, Jørgen Chemnitz blogg-mini ilaatigiut taama allappoq.

– Unikaallanngivillunga napparsimmaviup tungaanut arpaannartunga angutip utoqqaap tupigusuppasilluni isigaanga. Teqeqqoq uiarakku takulerpakka napparsimmavimmi sulisut igalaatigut itsuannisaartut ilaallu aneersuartarfimmut aniasimasut (nakorsaq peqqissaasorlu peqanngillat – utaqqisinneqarsinnaanngitsumik suliassaqarsimassapput). Arlallit qinngusersaarput, nilliuaartarput, taamaallutillu suaarpallapput: aallaavaat! Uniffeerutivippunga ?soorlu tassa løve mattunneqarsimasoq. Aatsaat taama nannumik qanillitigisaqaraluarpunga, sulili assilinngikkigaluunniit aallaarpallappaat.

Jørgen Chemnitz-ip bloggia uani atuaruk.