Aki ataaseq

Tele-Postip oqarasuaatikkut iikkamut attavilikkut sianerneq akikillivaa, nunalu tamakkerlugu akit assigiissilerlugit.

Oqarasuaatikkut angallattagaanngitsukkut sianerneq ataasinngornermiit akikillivoq, illoqarfinnullu allanut sianerneq illoqarfimmi najugarisami sianernertut akeqalerpoq, nunatsinnut tamarmut atuuttussamik akimik assigiimmik TELE-POST-ip siunnersuuteqarnera Naalakkersuisut akuerimmassuk.

Aki ulluunerani minutsimut 44 øriulerpoq, maannamut 99 øriusimalluni, unnukkulli unnuakkullu sianerneq akeqalerluni minutsimut 22 ørimik, siornatigut 49 øreqarsimalluni.

- Ullumikkut nunatsinni akiusumut naleqqiullugu akiata affaa ataallugu akeqalerpoq, TELE-POST-illu naatsorsuinera malillugu tamanna atuisunut ukiumut 3,7 millioner kroninik sipaaruteqarfiussasoq.

TELE-POST-ip akimik taama annertutigisumik appaaneranut pissutaavoq, kissaatigineqarmat atuisunut akit assigiinnerullutillu piariinnerunissaat. Nuna tamakkerlugu sianernermi aki assigiisinneqarpat, atuisup akinik sanilliussisinnaanera ajornannginnerulissaaq.

Nunatsinnut tamarmut aki nutaaq atorneqalerpat aamma siunissami atuisut illoqarfimmut allamut nuunnerminni telefonnormumik pigiinnarsinnaanissaa periarfissanngussaaq, Tele-Post tusagassiuutinut allappoq.

Powered by Labrador CMS