Meeqqat pillugit ataatsimeersuarnerit
Meeqqat, inuusuttut ilaqutariillu atugarisaat ataatsimeersuarnermi sammineqassapput qulequtaralugit ilaqutariit meerartallit, pitsaaliuineq katsorsaanerlu kiisalu meeqqat inuunerissut.
Sisimiuni kulturikkut illorsuarmi “Taseralimmi” aamma Knud Rasmussenip Højskoliani juunip sisamaanit arfernat ilanngullugu “Ilaqutariit Nukittuut” qulequtaralugu Ilaqutariinnermut Peqqissutsimullu Naalakkersuisoqarfik aamma Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik kiisalu Paarisap aaqqissugaanik ataatsimeersuartoqalerpoq.
Atorfilittat qinikkallu saniatigut peqataasussat tassaapput: ilinniartitsisut, peqatigiiffiit, kattuffiit, angajoqqaarsiat, ulluinnarni meeqqanik inuusuttunillu sullissisut, soorlu isumaginnittoqarfinni, meeqqerivinni atuarfeqarfinnilu sulisut. Aamma ikaarsaariarnermi ataatsimiititaliani ilaasortanik peqataasoqassaaq.
Ataatsimeersuarnermi immikkut ilisimasallit saqqummiisassapput kingornatigullu eqimattakkuutaani oqallittoqartassaaq. Peqataasut misilittakkaminnik isumassarsiaminnillu avitseqatigiinnermikkut suliniutissanik iliuuseqarnissanullu siunnersuusiortassapput.
Ataatsimeersuarnerup ingerlanerani aamma meeqqat inuusuttuaqqallu immikkut ataatsimeersuartinneqassapput, taakku “Meeraalluni Nuann’” qulequtaralugu
FN-ip meeqqanut inuusuttunullu pisinnaatitaaffiitut aalajangersagai kiisalu Kalaallit Nunaanni inatsisitigut meeqqat illersorneqarnerat sammissavaat. Ullut pingajuanni meeqqat inuusuttuaqqallu “Ilaqutariit Nukittuut” ataatsimeersuarnerannut ilanngutissapput innersuussutiminnillu saqqummiiumaarlutik.
Meeqqanut, inuusuttunut ilaqutariinnullu siunissami suliniutissanik qinikkanut innersuussuteqarnissaq ataatsimeersuarnermi anguniarneqarpoq.