H.C. Hansen USA-mi kilitsissiat allattorsiaffianni

H.C. Hansen ukiuni 1943-46-mut USA-mit amerikamiut kilitsissiaqarfiannut kilitsissiatut isigineqarsimavoq. Tamanna oqaluttuarisaarnermi immikkut ilisimatuup Peer Henrik Hansenip piffissama taaneqartumi CIA-p Danmarkmimut attaveqartarsimaneri pillugit pingasunngornermi ph.d-nngorniarluni soraarummeerutini illersorlugu saqqummiinermini tamanut saqqummiuppaa.

H.C. Hansen danskit attaveqarfigisartakkat allattorsimaffianni "Big Horn"-imik atequteqarsimavoq, aamma tassaniipput major Svend Truelsen aamma professor Erik Husfeldt, taakku tulleriinneri malillugit "Orange Juice"-imik aamma "Babylon"-imik atequteqartinneqarsimasut.

Jylland-Posten naapertorlugu Peer Henrik Hansenip ilisimatusarnerata paasinarsitippaa H.C. Hanseni sorsunnersuit aappaata qaangiunnerata kinguninngua amerikamiunut qanimut attaveqalersimasoq.

Tiguagaaqqanerup nalaani Socialdemokraatit naalakkersuisut tiguaasimasunullu akersuuttut akornanni ataatsimiitsitaliami inerteqqutasumi inissisimasimapput. Naalakkersuisuni aniguisitaanerup nalaani issiasuni aningaasaqarnermut ministerinngorpoq, 1953-imiit nunanut allanut ministerinngorluni taavalu 1955-imiit 1960-imi toqussi tikillugu statsministeriusimalluni.

1957-imi amerikamiut Kalaallit Nunaanni Thulemi sakkutooqarfimmi atominiki sakkussianik inissisimatitsisinnaanerat akuersissutigaa. Tamanna taamanikkut Danmarkip Socialdemokratiet-it Danmarkip nunataani atominik sakkussianut "naaggaarpugut"-imik politikkeqarnerannut akerliulluinnarsimavoq. Akuersissut taamaalilluni isertuugaasimavoq, Thule pillugu allakkat taamatut allannillit Nunanut allanut ministeriaqarfiup toqqorsivianni 1995-imi nassaarineqarnissaata tungaanut.

Peer Henrik Hanseni ph.d-nngorniumminik illersuinermini oqarpoq, paasissutissat nutaat taamanikkut pissusiusunut tunngatillugu isiginiarneqartariaqartoq, taamanikkut sovjet-imit tiguarneqarnissaq ernummatigineqarmat.

"Danmarkimi demokratii taamanikkut paasiuminaatsuusimanerpa, danskit ilaat inerteqqutaasut killeqarfigisaanni sulillutik imaluunniit pissaaneq anneq sulissullugu killissarititaasoq qaangerlugu sulisimanerpat? Taamaassimassappat demokratiip isaanik isigalugu apeqqutaalerpoq: Taamaaliortoqarsinnaava taamaaliorsinnaatitaanerlunilu? Imaluunniit H.C. Hansenip amerikamiut atominik qaartartuliarsuarnik Kalaallit Nunaanniititsisinnaanerannut akuersissuteqarsimaneranut peqquterpiaasoq allarluinnaasimanerluni? Qanorluunniit inissisimassimagaluarpat amerikamiut pappiaraataanni takuneqarsinnaavoq, taamanikkut socialdemokraatiugaanni ammasumik qanoq iliuuseqarsinnaanermit ingasannerujussuarmik amerikamiunik tapersersuisuusimasoq," Peer Henrik Hansen oqarpoq.