Saffiugassanik ujaasineq, Ujarassiorit 2008, aallartippoq

Nuna tamakkerlugu ujarassiornermik soqutigisalinnut tamanut unammisitsineq – ukiormanna 2008-mi 19-inissaa ingerlanneqartoq aallarteriivippoq.

Akissarsiassat akileraarutitaqanngitsut katillugit 120.000 kroniupput, taakkunan¬nga ajugaasup 55.000 kronit pissarsiassarai.

Ujarassiorit ingerlanneqarpoq aningaasalersorneqarlunilu Aatsitassanut Pisortaqarfimmit. GrønlandsBankip Inuussutissarsiutinut aningaasaateqarfia ajugaasumut tullianullu 40.000 kroninik akileraarutitaqanngitsunik tapiivoq.

Nutaatut ukiormanna Aatsitassanut Pisortaqarfiup nittartagaq aallartippaa, tassanilu ujarassiortut paasissutissanik pisarialinnik pissarsisinnaapput: www.ujarassiorit.gl

Ujarassiornermut peqataanermut paasissutissat saniatigut aamma quppersakkat saqqummersitallu allat ujarassiornermi iluaqutaasinnaasut internetikkut aaneqarsinnaapput. Assersuutigiinnarlugu atuagaq ”Mineral-guide – Prospektering for amatører” juulip qaammataani allakkerivinni tamani akeqanngitsumik pineqarsinnaalissaaq.

Allakkerivimmissaaq pineqarsinnaapput unamminermi peqataasutut nassiussilernermi atugassat kiisalu immersugassaq ateq, najukkap il.il. nalunaarsorneqarfissaat. Aamma nunap assinga pissarsiassaavoq, tassanilu nassaarfik nalunaarneqassaaq. Nassiussineq akeqanngilaq.

Ukiormanna Ujarassiorimmut peqataasut nassaavi tiguneqareersimassapput 1. oktober 2008 nallertinnagu.

Inuussutissarsiutiginagu ujarassiortut Kalaallit Nunaanni inuit allattorsimaffianni nalunaarsorsimasut kisimik peqataasinnaapput. Nassaat Kalaallit Nunaanneersuinnaat nassiunneqarsinnaapput, aamma sumi nassaarineqarsimanerat erseqqissumik nalunaarneqarsimassaaq. Nassiussat tigusat utertinneqassanngillat.

Powered by Labrador CMS