Immamik uuttortaanerit isumannaallisaataapput

Søopmåling Grønlandip kalaallit nunaata imartaani navianarpallaarunnaarnissaa arriitsumik qularnaatsumilli isumagaa.

Kalaallit Nunaata imartaata ilarujussua eqqoqqissaartumik suli uuttortarneqanngilaq, kisianni Søopmåling Grønlandip imartat uuttortarneqanngitsut ukiut tamaasa ikiliartorusaartippaa, taamak Illersornissamut sakkutuut internetimi nittartakkaminni allapput.

Umiarsuit takornariartaassuit 30-it Kalaallit Nunaannut ukiut tamaasa tikittarput, tusinfilikkaanik ilaasoqartarlutik. Umiarsuillu immap assiginginik eqqoqqissaartunik pigisaqanngippata tamanna ajunaarnersuavimmik kinguneqarsinnaavoq.

Umiarsuaq Kalaallit Nunaata imartaani ikkarluit takussaanngitsut, anorersuit iluliarsuillu aserorsinnaasartut akornanni angalatillugu immap assingi eqqoqqissaartut piginissaat pingaarutilerujussuuvoq.

- Uuttortaanerit tamarmik uagutsinnut assigiimmik pingaarput. Uuttortaanerit ilaat allanit sillimaniarnissamut pingaaruteqarnerupput, kisianni uannut suliamullu tunngatillugu tamarmik pingaaqatigiipput, kaptajnløjtnant Uni Bull oqarpoq.

Uni Bull umiarsuaaqqanut uuttortaatinut marluusunut SKA 12 aamma SKA 16-imut naalagaavoq, umiarsuaaqqat takku marluk aasat tamaasa kalaallit nunaata imartaani uuttortaasarput. Umiarsuaaqqat maannakkut Nuummiipput, maajip 12-iani uuttortaaqqilernissartik naatorsuutigalugu. Umiarsuaaqqat taakku marluk ukioq manna uuttortaanernik annertungaatsiartunik suliassaqarput.

Aalajangersimasumik ingerlaffeqarluni ingerlaartarneq immallu naqqanik uuttortaanerit assigiiaaginnarmik sulinertut takorloorneqarsinnaavoq, kisianni Kalaallit Nunaanni taamaanngilaq.

Danmarkimut sanilliullugu immap itissusai assigiinngitsorujussuupput, paasissutissallu eqqoqqissaartut pissarsiariniartillugit ikkarluppassuit, qeqertaararpassuit uiarterlugillu kaajallattariaqartarput.

- Taamaattumik Kalaallit Nunaanni imartani uuttortaanerit assorsuaq allanngorartuuppuyt, Uni Bull naggasiivoq.

Powered by Labrador CMS