Kalaallit Nunaat pilluarit

Kalaallit qallunaallu namminersorneq pillugu isumalioqatigiissitaata siulittaasuisa marlunngornermi isumaliutissiissut naalakkersuisut siulittaasuannut Hans Enoksenimut statsminister Anders Fogh Rasmussenimullu tunniummassuk inuit Katuamut isaasut amerlalluinnarput.

-Kalaallit Nunaata Danmarkillu ataatsimoorlutik oqaluttuarisaaneranni pisoq pingaaruteqaqaaq, Anders Fogh Rasmussen oqarpoq.

-Statsminister qujanarsuaq, statsiministeritut kalaallinut innuttaasunut nammineq aalajangiisinnaasuseqalernerannik tunniussisusut oqaluttuarisaanermut immikkut taasarialittut oqaatigineqarsinnaalerputit, naalakkersuisut siulittaasuat Hans Enoksen oqarpoq.

Kalaallit qallunaallu namminersorneq pillugu isumalioqatigiissitaani siulittaasuutut Jonathan Motzfeldt (Siumut) aamma Christian Mejdahl (V) oqalugiaamminni assigiimmik oqaaseqarput, tamarmillu isumaqatigiillutik inussuttut namminersorneq tigulluarumaaraat kissaatigalugu oqaatigaat, aammalu namminersorneq pillugu inatsisissatut siunnersuut taasumalu imai oqallisigiumaraat.

- Inuusuttut namminersornerup inatsisaata isumaa piviusunngortittussaavaat.

Siulittaasut marluullutik tamarmik ukiuni 30-ini namminersornerulluni ingerlatsisimanerup iluatsilluarsimanera oqaatigaat.

- Kalaallit Nunaat nunarsuup issittortaani inuiaqatigiittut nutaaliatut ineriartorsimavoq, tamannalu namminersornerulluni oqartussaanerup iluatsilluarsimaneranut uppernarsaataavoq, siulittaasut oqarput. Statsministerillu ilannguppaa, taamanikkut namminersornerulernissap eqqunneqarnissaanut isuma eqqunneqarmat taamanikkut politikerit siumut isigisuusimasut.

Namminiilivinnissaq eqqaanaveersaarpaa, oqaaserli "namminersorneq annertusisaq" atorlugu.

- Ullumikkut umiarsuaq Kalaallit Nunaata namminersornermut annertunerusumik ingerlasussaq singipparput. Kalaallit annertusisamik namminersulernissamik kissaateqarnerat Danmarkimi naalakkersuisut tamakkiisumik tapersersorpaat, Anders Fogh Rasmussen oqarpoq, erseqqissarpaalu inuit namminneerlutik aalajangiisinnaassuseqarnerat nammineq pingaartikkini.

Statsministerip aamma oqaatigaa annertusisamik namminersulernerup malitsigisaanik peqqissutsikkut inuuniarnikkullu pissutsut pitsaanerulernissaat naalakkersuisut naatsorsuutigigaat.

Oqalugiartut tamarmik Kalaallit Nunaat namminersulerpat Kalaallit Nunaata Danmarkillu akornanni qilerutit sanngiillisinneqarnatik nukittorsarneqarlutili ingerlanissaannik upperinnillutik oqaatigaat.

Anders Fogh Rasmussen aamma Christian Mejdahl tusarnaariartorpassuarnit hundredelikkaanngorlutik isaasimasut qiimmattarlutik pattaallutillu hurra-rtuutunit malunnartumik sunnertipput. Erinarsoqatigiit NIPE-kkut kingullermik erinarsosrnanni nukuillutik erinarsuut malillugu kalaallit suleqatitik peqatigalugit assaminnik pattallutillu sanimut aalataaqataapput....

Namminersorneq pillugu isumaliutissiissut ukioq manna novembarip 25-iani innuttaasunut taasissutigineqassaaq, taamalu namminersornerup 2009-mi juunip 21-anni eqqunneqarnissaa naatsorsuutigineqarluni.

Oqalugiaatit tamarmik talerpiatungaani aaneqarsinnaapput...