Ilimanami sap.ak. 18

Arfininngorneq 26.04.08 aallartittoqarpoq Lars Hansenip atuarfiani atuartut isiginnaartitsillutik qulequtserlugu (nuannaarneq, nuannaannginnerlu.) (meeqqanut qinngasaarineq inersimasuni ingutsineq) isiginnaartitsinerup kingorna meeqqat inersimasullu oqaaseqartinneqarput. Isiginnaartitsissutissarlu meeqqat namminneerlutik toqqarpaat. Piareermata eqaarsaarneq ingerlanneqarpoq nuannisarfigilluarneqartumik, eqaarsaareermata kaffisuunnermik naggaserneqarpoq.

Ataasinngorneq 28.04.08 pinaveersaartitsinermi ataatsimiititaliap aaqqissuussaraa.

Taannalu ingerlanneqarpoq nal. 19:00: Erinarsoqatigiinnermik aallarnerneqarpoq atorlugu (ataatsimoorniarpugut taakkuulluta). Taannalu naammat Nunaqarfimmi Aqutsisut siulittaasuata Fritz Johansenip uge 18 ammarlugu oqaaseqarpoq. Oqaaseqareermat pinaveersaartitsinermi ataatsimiititaliap suilittaasua oqaaseqarpoq qulequtaralugu uge 18 pinaveersaartitsinermi suliat nunaqarfitsinni ataatsimoorneq. Tamannalu naammassimmat najoqqaaqatigiinneq tamanut ammasoq ingerlanneqarluni saniatigut oqaloqatigiinnerit ingerlanneqarlutik nal.: 20:30-p tungaanut ingerlanneqarpoq. Nal.: 20:30 unikkallarneq pivoq piareermata meeqqat angerlartinneqarput katerisimaarnermilu peqataasut ataasiakkaat imigassamut ikiaroornartumut naamaarnermulluunniit tunngatillugu misigisimasaminnik saqqummiisinnaanerat ammaanneqarpoq. Tamannalu ingerlalluarpoq. Oqallinnerillu naammassimmata erinarsoqatigiinneq atorlugu (eqqissisinnga aat).

Marlunngorneq 29.04.08 Evap nakorsiartarfianiit aaqqissuunneqarpoq.

Pilersaarutigineqartut malillugit ingerlanneqarpoq ullaakkut nal.: 09:00-miit 14:00-lip tungaanut tamanut ammasumik pulaarneqarsinnaalluni. Imminut tunngatillugu paasiniaasinnaanerit ammatinneqarlutik inuppaalunnguanik soqutineqarluni ornigarluarneqartumik. Taamatullu nal.: 16:00 kikkulluunniit pisuttuaqatigiinnerat. Sila pitsaavallaanngikkaluaqisoq siallerluni inunnik peqataaffigilluarneqarpoq.

Pingasunngorneq 30.04.08 illerfissarsiutileqatigiit utoqqaat peqatigiillu ingerlappaat.

Nal.: 18:00 aallartillutik tamanut kaffi tii kaagillu, nal.: 19:00 miss. ilaqutariinnguit isiginnaartitsinerat ingerlanneqarpoq nuannisarfigilluarneqaqisumik. Isiginnaartitsinerit marluiupput siulleq ilaqutariinnguit ittorsuat ningiuat paniat ernutaallu nuannarilluarneqaqalutik isiginnaartitsissutigineqarpoq. Aappaattullu kommunerujussuanngornissamut qinersineq nuannersorsuarmik qineqqusaarfigilluarneqarlunilu ingerlanneqarpoq isiginnaartunik nuannarilluarneqarlutik. Erinarsoqatigiittarneq mininneqanngilaq.

Sisamanngorneq 01.05.08

Oqaluffimmi pattattumik tusarnaartitsineq ingerlanneqarpoq nal.: 18:00-miit 19:00-lip tungaanut piumasullu tusarnaarusutaminnik toqqaatinneqartarlutik. Nal.: 19:00-miillu Ilagiit sinniissaat katersortarfimmi unnussiortitsivoq kaffi tiilu erinarsoqatigiinneq oqaaseqartarnerillu ingerlanneqarput.

Tallimanngorneq 02.05.08 Neriuffik Ilimanaq

Nal.: 19:00 aallarnerfigalugu Tasersiap eqqaani kaffisuullutillu tiituupput kaagit mininneqanngillat aammalumi meeqqanut juice sassaalliutigineqarpoq. Nal.: 19:30 missaani arsarneq ingerlanneqarpoq avannaa tungaarmiut kujataa tungaarmiunut unammillerlutik, tassanilu kujataa tungaarmiut ajugaapput 2-0, taannalu naammassimmat arpattagiarlutik unammipput avannaa tungaarmiunaasiit kujataa tungaarmiunut unammillerlutik tassani kujataa tungaarmiut ajugaaqqipput.

Arfininngorneq 03.05.08 IPQ Ilimanaq

Ilimanami peqatigiiffik qimusseq aaqqissuisoralugu meeqqat ataatsimik ukiulinniit tallimanik ukiulinnut sukkanniuutsinneqarput Tasinnguaq qallermiik Tasersiap tungaanut ataatsimik qimmilerlugit, tassanilu nr. 1 Kaassannguaq Rosbach nr.2 Muku Johansen nr. 3 Aima Jerimiassen. Taamatullu meeqqat anginerit arfinilinniik 13-nut ukiullit sukkanniuutsinneqarput tassanilu nr. 1 Carla Rosbach, nr. 2 Ove Martin L. Rosbach. Taakkulu piareermata alupaat sukkanniuupput, tassanilu peqataasut arfiniliupput. Nr. 1 John Rosbach Regine Lange-lu, nr. 2 Samuel Sakæussen Eunike Villadsenilu, nr. 3 Ove Villadsen Arnaq J. Villadsen, nr. 4 Arne Lange Martha Rosbach, nr. 5 Samuel Villadsen Regine Johansen, nr. 6 Abel & Miitinnguaq R. Therkelsen. Sukkanniuunnerit nuannarineqarluarput. Unnukkut katersortarfimmi piginnaanillit qaagitsi ingerlanneqarmat sukkanniuunnermi normoqartunik ujaminnatsinneqarput nuannisarfigilluarneqartumik. Pinnguaatinillu arlalinnik unammititsisoqarluni kikkunnilluunniit aaqqissorneqarluni.

Sapaat 04.05.08 sapaatip akunnerani peqataasimasunik tamanik aaqqissorneqartumik nerersuaqatigiinneq ingerlanneqarpoq katersortarfimmi nal.: 14:00-miit. Sapaatip akunnera tamaat naallugu susassaqartitsinernik ingerlanneqarpoq inuppassuarnit peqataaffigineqartumik.

Pinaveersaartitsinermi ataatsimiititaliamiit nalilerneqarpoq iluatsilluartutut nuannersarfigilluarneqartumillu.

Ikinngutinnersumik

Pinaveersaartitsinermi ataatsimiititaliaq sinnerlugu