Tasiilami sapaatip akunnerata 18-iat
Tasiilami sapaatip akunnera 18-i isiginnaartitsisartunit Qinngorniit-neersunit meeqqanit inuusuttunillu 7-t 18-illu akornanni ukiulinnit 40-nit peqataaffigineqartumik isiginnaartitsinermik nuannersumik naggaserneqarpoq, ilitsersuisoralugu Orto Ignatiussen.
Nunatta Kangiani meeqqat inuusuttullu isiginnaartitsisartut "Qinngorniit" ilitsersuisuat aqutsisuallu Orto Ignatiussen illoqarfimmut utersimaleriarmat aallartilluaqqissimapput.
-Sapaatip akunnera 18-imut atatillugu Tasiilami katersortarfimmi sapaatiummat naggataarutaasumik isiginnaartitsinermi isiginnaartitsissut assut eqqarsaatersortitsilernartoq isiginnaartitsissutigaat.
Isiginnaartitsinerup imaraa inersimasut assortuuttut, meeqqatik puigorlugit imminuinnaq eqqarsaatigisut. Meeqqat pillugit oqallinnermi qulequtaq soqutiginaateqarluartoq. Naggataarutaasoq paatsuugassaanngilaq. Isiginnaartitsinermi isiginnaartitsissummi kingullerpaami ilaqutariit naggataagut qanoq ilillutik asanninnermik imminnut tunisut takutinneqarpoq - meeqqanit namminermit kissaatigineqartoq kissalaartoq.
Orto Ignatiussenip meeqqat peqatigalugit pilersitsisarnermini isiginnaagassiani suliarisartakkamini paasiuminaatsutigut aammalu ilungersunartutigut quianarsinnaasartutigullu qulequttat ilungersunarsinnaasartut sapiiserluni isiginnaartitsissusiarisarsimavai.
Isiginnaartitsereernerup kingorna kommunalbestyrelsemut qinigaallaaq Harald Bianco aamma Ammassalimmi sunngiffimmi sammisassaqartitsinermut inspektøriusoq aqutsisoralugu oqallittoqarpoq.
Inuusuttut utoqqaallu oqallinnermut imigassamik atornerluinermut aningaasanoorajuttuunermullu tunngasumut eqeersimaarlutik peqataapput. Ajornartorsiutit qaangerniarlugit soqutiginnittut malunnartumik amerlapput, tassa katersortarfik ulikkaavimmat. Oqallinnerit akornanni aamma ataatsimoortumik erinarsoqatigiinnerit kaffisoqatigiinnerillu pipput.