Inatsisartut suleriaasiat nutarterneqassaaq
Nutarterinissaq piviusunngussappat Inatsisartut suleriaatsiannik allannguisoqartariaqassaaq, upernaakkullu katersuunnerup nalaani siunnersuut akuerineqassappat, suleriaatsit nutaat ukiaru ataatsimiinnerup piareersarneqarnerani atorneqarsinnaanngoriissallutik, KNR tusarliivoq.
Inatsisartut suleriaasiata nutarterneqarnissaa pillugu apeqquteqaat aallaavigalugu Inatsisartut ullumi ataatsimiinneranni oqallisigineqassaaq.
Politikkikkut aalajangiiffigisissat eqaannerusumik angusaqarfiunissaat siunertaralugu siunnersuusiortoqarpoq. Atortorissaarutit nutarterneqarnissaat pingaarnertut kissaatigineqarpoq.
Inatsisartuni suleriaatsip nutarterneqarnissaanik isuma nutarterneqaraluttualerpoq, siulittaasoqarfiullu kissaataa kiisami timitalerneqartussanngorluni.
Apeqquteqaatit aallaavigalugit oqallinnerminni inatsisartunut ilaasortat ataatsimiittarfimmi issiavimminniit nikinnatik oqaaseqarsinnaalissapput, taasisarfiillu qarasaasiakkoortut aqqutigalugit inernerit inersuarmi saqqummersitsisarfeqalissallutik.
Oqaluttaanermi atortut nutaat, siammerterinermullu atortut aamma nutaat atorneqalissallutik.
Ilaasortat issiaviini qaraasiakkut attaveqarfissaqalissaaq, siunnersuutit oqallisigineqartut pillugit paasissutissat taamaaliornikkut pissarsiarineqarsinnaanngussallutik.
Atortorissaarutitigut nutarterinerit aqqutigalugit Inatsisartuni suleriaatsimik allannguiniarneq eqaannerusumik sulisoqarsinnaalernissaq anguniarneqarpoq, Inatsisartullu ataatsimiittarnerat naannerusalissanersut sivitsorneqassanersulluunniit apeqqutaalissaaq.
Allatut oqaatigalugu:
Inatsisartunut ilaasortat sulisartutulli allatulli inatsisartuni sulinertik suliffittut tamakkiisutut ilaasortaanertik isigilissanerpaat? Siunissap tamanna takutikkumaarpaa.