Nukappiaqqaat eqqaassisut
Nutartigaq: Nukappiaqqat 8-nik, 9-nik 13-innillu ukiullit marlunngornermi ualilaarnerani Kapisilinni illumut eqqaassilermata politiit ornigukkasuarneranik kinguneqarpoq.
Illumi eqqaanneqartumi ineqartut ikiortissarsiorlutik sianereersullu Nuup poitiivini politiit Air Greenlæandip qulimiguuliutaanik attartorlutik ingerlaannaq aallarput, Nuummi politeeqarfimmi pigaartuusoq ilisimatitsivoq.
Politiit nunaqarfimmut tikimmata nukappiaqqat suli eqqaassipput, politeeqarfimmi pisortap tullia Morten Nielsen ilisimatitsivoq. Politiit nukappiaqqat sakkuminnik iperaaqqullugit tunniutiinnaqqullugillu peqqusinertik iluatsippaat. Tamatuma kingorna nukappiaqqat Nuummut oqqunneqarput, tassani suli 15-iliisimanngitsuummata inunnik isumaginninnermik sulialinnut tunniunneqarput.
Nukappiaqqat meeqqanik katsorsaavimmi Meeqqat Illuanni najugaqartuupput, paaqqutarineqarnerminnullu atatillugu inissiisarfiup Kapisilinni illuanniillutik.
Paaqqinnittarfiup pisortaa Torben Alne oqarpoq meeqqat sisamaat, aallaasersornermut akuliusimanngitsoq, sulisullu maanna Nuummut utersimalersut, misigisaasalu nanertuutinngunnginnissaat anguniarlugu ikiorserneqarlutik.
Nukappiaqqat Meeqqat Illuanni ukiuni marlussunni najugaqarsimapput.
Eqqaassinermut peqqutaasoq iluamik paasineqanngilaq, kisianni aaqqiagiinngissuteqarneq peqqutaasinnaasoq politiit ilisimatitsissutigaat.
Aallaasit nNukappiaqqat tillissimavaat. Tassungalu atatillugu politiit kajumissaaripput, aallaasit isumannaatsumiitinneqassasut, aammalu qaaraasua patrone-llu aallaammit avissaartillugit inissinneqartassasut, taamaaliornnikkut tillinniartut aallaasersorsinnaannginniassammata.