Kukkunikkut millionærinngortoq
Nanortalimmi angut suliffeqanngitsoq kukkunikkut kontoanut millioninik ikisiffigineqarpoq. Kukkuneq paasineqarmat angutip millionip affangajai atoreersimagai KNR oqaluttuarpoq.
Angut isumaqarsimavoq klasselotteri-mi eqquisimalluni, kisianni BRF Bankip inuup inuttut normu kontomut piginnittutut kukkunikkut qarasaasiamut immiussimavaa. Angutip bankimi tassani atuisuusimanngisaannartup aningaasat ilumut pigigini uppernarsereeramiuk kalaallit nunaanni kontominut nuutitissimavai.
Nanortalimmi politeeqarfimmi pisortaq Niels Nyvang Nielsen naapertorlugu angutip sapaatit akunnerisa pingasut ingerlaneranni 450.000 kr.-nit atoreersimavai. Illoqarfimmi imerniartarfinni festerluavissimapput. Angut imminut angallatisissullunilu computerisisimavoq, ilaqutai tamarmik telefonimik angallattakkamik pisaarput, Brugsenimi inunnut pisariaqartitsinerartunut qamutit nioqqutissanik immertakkat ulikkaartaarpai, illoqarfimmilu inunnut pissakilliortunut aningaasanik agguaasimalluni.
Politiit anguit pisiarisimasai arsaarinnissutigaat, kisianni 450.000 kr.-it amerlanersaat tunniussuullugit nungussimapput, taamalu uterteqqinneqarsinnaanatik. Angut nassaanik unioqqutitsilluni atuisimasutut pasineqarpoq, kisianni politeeqarfimmi pisortap Niels Nyvang Nielsenip KNR-ikkut suliap eqqumiikkajaajunera isumaqataaffigaa, tassa angut taanna ilumut taamaattoqarneranik upperinnilluni taamatut pissusilersorsimammat.