The Times: Kalaallit Nunaat immaqa pissaanilissuanngussaaq

Tuluit aviisianni The Timesimi allaatigisaq pingaarneq qulequtaqarpoq »Greenland in Pole position«, Kalaallit Nunaat nunatut pissaanilissuanngornissamut piareersutut allaatserineqarluni, knr.gl allappoq.

Statsminister Anders Fogh Rasmussen Hans Enoksenilu erngutsisartoq, namminersorneq pillugu isumaliutissiissut tunniunneqarmat.

Namminersornersoq pillugu isumaliutissiissutip Katuami marlunngormat tunniunneqarnera nunani allani aviisini arlalinni sammineqarpoq.Allaatigisami pingaarnermi namminersulernissamik eqqarsarneq namminersulivinnissamut ikaarsaariarfissatut, eqqaaneqarpoq.

- Kalaallit Nunaata allatut ingerlariaaseqarsinnaanini siornatigut takutittareerpaa, tamanna EU-mit 1985-imi anigami takutippaa, Times allaaserinnippoq.

The Times-ip aamma eqqaasitsissutigaa, Kalaallit Nunaat angissutsimigut tassaammat nunarsuarmi nunat anginerpaat 14-iat.

Kalaallit Nunaat aamma nunarsuarmi nunat pisuunerpaat 25-ssarilersinnaagaat oqaatigineqarpoq. Apeqqutaassaarligooq silaannaap kissakkiartornerata kingunerisaanik, sermersuup aanneratigut aatsitassat uuliallu killeqanngiusattumik piiarneqarsinnaalernissaat, aningaasatigut isertitsissutaarujussuarsinnaasumik.

- Taamaattoqassappat, taava Kalaallit Nunaat kikkunnut atanerulissava? Times aperaaq.

- USA-mut imaluunniit Europamut? Kalaallit Nunaata koruuni atorunnaarlugu Euro atulissavaa? Kalaallit Nunaat nunarsuarmi erinarsornermik unammiuaarfimmut Melodi Grand Prix-mut nunatut immikkut taava aamma peqataasalissava? Kalaallit Nunaata Savalimmiut arsaannermi ajugaaffigisinnaassalissavaa? Kalaallit Nunaat Naalagaaffiit Peqatigiiffianni FN-imi taasisinnaassuseqalissava?

Tamakkorpassuupput The Timesip allaatigisamini pingaarnermi apeqqutigisai.

- Nuuk tassaannaanngilaq aalisakkanik, sermimik illuikkanillu takusiffiusinnaasoq. Allarujussuarnik aamma nassaassaqarfiulissaaq. Naalagaaffik nutaaq nunarsuarmi tupaallatsitsinissaminut piareerpoq, Tuluit aviisersuat naggasiivoq.

Powered by Labrador CMS