Sukkortut ilimagisamit ikinnerupput
Peqqinnartumilli inuuneqarnerup eqqumaffiginissaa suli pisariaqarpoq toqujaartarneq nappaqqajaanerlu ingalassimatinniarlugit, taama nakorsaq oqarpoq.
Nunatsinni misissuinerup nutaap sukkornermut nakorsamit Michael Lynge Pedersen-imit ingerlanneqartup takutippaa 40-ut sinnerlugit ukiullit 2 procent-ii diabetes 2-mik tassalu sukkornermik nappaateqartut.
Kisitsit allaanerulluinnarpoq 1999-imi innuttaasut peqqissusaannik misissuinerup inerneranit taamanikkut 35-iniit qummut ukiullit 10 procent-i diabetes 2-mik nappaateqarmata.
– Taakku misissuinerit inerneri assigiinngitsorujussuupput. Imaassinnaavorli inuit ilarpassuisa suli paasisimanngikkaat sukkornermik nappaateqarnertik, taama Michael Lynge Pedersen oqarpoq.
Kisitsisit nutaat nunatsinneersut Danmark-imi kisitsinit appasinnerupput.
Nakorsaasiorfik Novo Nordisk 10 millioner krone-nik aningaasaliinikuuvoq ukiuni pingasuni sukkorneq pillugu nunatsinni suliniutinut atugassanik tassungalu atatillugu Michael Lynge Pedersen ukiormanna februarip aallaqqaataani atorfinippoq.
– Takusinnaavarput nunani killerni inooriaasaq Kalaallit Nunaanni atugaaleriartortoq timi atorpallaarunnaarlugu aammalu kaloriaqarpallaanik nerisaqarnikkut. Tamakku pissutaasarput diabetes 2-mik nappaateqalersinnaanermut, taama Michael Lynge Pedersen oqarpoq.
– Pualavallaat amerlapput uummallulersinnaasut, diabetes 2-qalersinnaasut allaallu kræft-imik nappaateqalersinnaasut. Nappaatit tamakku inooriaatsimit pisut pissutaasarput toqujaarnermut, napparsimaqqajaanermut taamalu inuunerup pitsaannginnerulerneranik kinguneqarsinnaallutik, taama Michael Lynge Pedersen oqarpoq.
Annerusumik atuarsinnaavutit Sermitsiami tallimanngornermi saqqummersumi.
Annerusumik atuarsinnaavutit Sermitsiami tallimanngornermi saqqummersumi.