Hotel Hvide Falk tunineqarpoq
Angallanneq aallartileruttortoq aappariit Ilulissani akunnittarfik tiguaat.
Hotel Hvide Falkimik piginnittortaat Tuuta Lynge Knudsen aamma Jakob Knudsen, Nuumeersut, ilaatigut ukiuni qulini kuultisiorfimmik Nalunaq-mik nerisassanik pilersuinermik milisittagaqarput, tassani nerisassanik pilersuinermik ingerlatsivik JK Catering Service Aps ingerlassimallugu. Siorna akunnittarfilerinermik misiliinialerput avannamullu Ilulissiarlutik, tassani Hotel Hvide Falk Erling Munkholmimit pisiaralugu.
– Allamik misileerusulersimavugut akunnittarfinnillu tuniniakkanik ujaasilerluta. Ilulissat toqqarparput, pissutigalugu tassani takornariaqarneq siuariartormat, Tuuta Lynge Knudsen Sermitsiaq.gl-imut oqaluttuarpoq.
Taassuma akunnittarfiup qanoq akilersimanerlugu oqaatigiumanngilaa, oqarlunili "akikitsuunngitsoq". Tuula Lynge Knudsen naapertorlugu akunnittarfik tamakkiisumik inniminniiffigineqarsimavoq sapaatip akunnerata tullianiit septemberip qiteqqunnissaata tungaanut.