Angajoqqaarsiat Fredericia-mi naapisimaartut

Sapaatip akunnerata naanerani 350-it sinnerlugit amerlassusilinnit peqataaffigineqartumik qallunaanik angajoqqaarsiarisimasaminnik kaffisoqatigiinnertalimmik naapisimaarneranni Bernhardt Olseni Ilulissaneersoq peqataasut amerlaqisut ilagaat.

Lisbeth Jensen med sin nu 50-årige plejesøn Bernhardt Olsen fra Ilulissat./Lisbeth Jensen ernersiaalu maanna 50-inik ukiulik Ilulissaneersoq.

Bernhardt Olsenimut 50-inik ukiulimmut Ilulissaneersumut Fredericia-mi 1969-imi meerarsiaanera ilaqutariinnut Jensen-ikkunnut Sanddal-imeersunut inuuneq naallugu ikinngutigiilernermut aallarniutaavoq. Sapaatip akunnerata naanerani anaanarsiani Lisbeth Jensen peqatigalugu kalaallit meerarsiat hold nummer 40 nalliuttorsiutiginiarlugit Fredericia Teater-imi kaffisoqatigiinnermut peqataapput, Fredericia Dagblad allappoq.

-Danmarkimut siullerpaamik tikeqqaarnera eqqaamalluarpara. Kalaallit Nunaanniit Københavnimut sivisuumik timmisartoreerluta Trelde Næs-imut taamanikkut ullaaralaakkut busserluta tikippugut, tassanngaaniillu Danmark akimorlugu biilerluta, Bernhardt Olsen oqaluttuarpoq.

Lillebæltip qulaagut seqineq nuivoq, Bernhardtillu orpippassuit portusuunik orpittallit qorsunnillu pilutallit siullerpaamik takuai.

Bernhardtip anaanarsiaanut Lisbeth Jenseimut Sanddal-imeersumut Bernhardtimik kalaallillu meerartaannik allanik naapitsineq tupaallannartuusimavoq, tupaallannartoq nuannersoq.

-Paneqarpugut kalaallinik meerarsianik atuaqateqartussamik, taamaattumik niviarsiaqqamik Ilulissaneersumik meerarsiartaarniarluta qinnuteqarsimavugut, kisianni nukappiaqqat amerlanerusimapput - taakkulu inissarsiniarlugit ajornakusoortinneqarsimavoq - tassa Bernhardt-i uagitsinniilerpoq. Tamannalu peqqissimissutiginngisaannarpara! Lisbeth Jensen Fredericia Danbladimut aalajangersaavoq.

Ukioq taanna angajoqqaarsiaasimasut taakkunalu meerarsiarisimasaat kalaallit, allallu siusinnerusukkut angajoqqaarsiaasimasut kiisalu kalaallinik meerarsiassanik suliniummi nammineq kajumissutsiminnik sulisimasut tamarmik qaaqqusaasimapput, taamaattumik kaffillerneq taanna rekordiliigunarpoq, peqataasut 350-it sinneqarlutik.

Borgmesteri Anthon Frederiksen siuttoralugu politikerit atorfilittallu Ilulissaneersut sapaatip akunnerini makkunanni illoqarfimmut tikeraarput. Fredericia Kommuneaniit ilaatigut peqataapput borgmester Uffe Steiner Jensen aamma Kalaallit Nunaannut tunngasunut ataatsimiitsitaliami siulittaasoq John Bech Hansen.

Powered by Labrador CMS