Knud Rasmusseni illinersiorlugu
Qaasuitsumi ilisimasassarsiortartup Knud Rasmussenip toquneraniit ukiut 75-it nalliusillugit ilisimasassarsiorneq nutaaq aallartittussanngorpoq - Arctic Explorer - qimussimik angalanerit nunarsuarmi isorartunersaat illinersiorlugu; qaasuitsumi ilisimasassarsiortartup 1921-24-imi Thulemik ilisimasassarsiorluni angalanerit tallimassaat Kalaallit Nunaanniit Manerassuarmut.
Aasamut Thulemiit Siberiamut ilisimasassarsiornissami anguniarneqarpoq, Issittoq ikaarlugu inuit kulturiat oqaatsitigut, ileqqotoqqatigut nunarsuarmillu isiginnittaasiat suli ataqatigiissuunersut. Ilisimasassarsiornermi peqataasut aqqutaani Issittumi inuuniarnikkut atukkat qanoq allanngoriartornersut allaaseriniarpaat - ilaatigut silaannaap allanngoriartornerisa kingunerisaanik.
Arctic Explorer timmisartumik ingerlanneqassaaq, taamalu ilisimasassarsiortut Thulemut ilisimasassarsiornerit tallimassaanni tikitaasa allaaserisimasaasalu ilaat arlallit uterfigissavaat.
Arctic Explorer-ip pilersaarusiornerani aallaaviusimavoq, Thulemut ilisimasassarsiorluni angalanerit tallimassaanniit sukumiisumik annertuumillu paasissutissanik katersuineq - tassungalu ilaapput paasissutissat siornatigut saqqummiunneqarsimanngitsut. Taakku akornanniippuyt filmi nipeqanngitsoq aamma assit leo Hansenip ilisimasassarsiornermi peqataasimasup assilisimasai.
Ilisimasassarsiornermi aaqqissuisuuvoq Morgenavisen Jyllands-Posten-ip JP Explorer-imik aaqqissuisut, taakku tamanna Galathea-å pingajussaanik ilisimasassarsiornerani isumassarsiaraat:
– Pilersaarut 2000-imili pilersaarusiulersimavarput, ilisimasassarsiornerullu Knud Rasmussenip toquneraniit ukiut 75-inngorneranni piviusunngorsinnaanera nuannaarutaavoq angisooq. Qimussiimik angalaneq isorartooq ilisimasassariortarnerni Danmarkip oqaluttuarisaanerani annerpaartaavoq, tassanngaaniit taamanikkut inuusut inooriaasiannit atorneqartarsimasut 20.000-it sinnillit, filmit, assit, allattugaatit titartakkallu apuunneqarput. Atuakkat atortullu misissuiffigineri assorsuaq isumassarsiorfiusimapput, aaqqissuisuuneq Henrik Thomsen oqarpoq.
Tusagassiortut assiliisartullu saniatigut aamma inuiaqatigiit ataasiakkaat inooriaasiannik immikkut ilisimasallit uumasunillu immikkut ilisimasallit Arctic Explorer-imi peqataassapput.
Ilisimasassarsiornerup pilersaarusiornerani ilaatigut Ilulissat Katersugaasiviat, Moesgård Museum, Københavnimi Zoo, Kalaallit Nunaanni Pinngortitaleriffik, Topas Travel aamma Air Greenland ikiuussimapput.
Assiliisartup Leo Hansenip Thulemut ilisimasassarsiornermit tallimassaanni peqataasup ernera Peder Leo-Hansen Nuummut tikeraassaaq, tassani Sermitsiap nalliuttorsiornissaanut atatillugu ataatami filmiliai takutillugillu oqalugiassalluni.