Inatsisartut pisortaat soraarniuteqarpoq
Nicolaj Sørensen Inatsisartut Allattoqarfianni septemberip aallaqqaataani suliunnaassaaq.
Nicolaj Sørensen 2000-imiilli inatsisartut allattoqarfianni sulisimavoq. Soraarniuteqarnerminut tunuliaquttani oqaatigiumanngilaa, oqarlunili naatsorsuutigalugu »siunissami sulinissani arlaanni atorneqassasoq kalaallinut inuiaqatigiinnut iluaqutaasumik«.
Nicolaj Sørensen tupaallatsitsivoq inatsisartuni siulittaasuusimasup Jonathan Motzfeldtip arnamut sulisumut kinguaassiuutitigut kanngunartuliorsimasutut politiinut nalunaarutigineqarneranut atatillugu tusagassiorfinnut nalunaarummi nassiussigami, tassani unnerluutiginninneq taallugu "isumassarsisinneqarluni mamarliiniarnertut". Nicolaj Sørensenip kingorna oqaatsit atorsimasani utoqqatsissutigai.
Sulisumut suliassaq alla peqatigalugu suliassaq tamanna eqqartuussissuserisumit misissorneqarpoq, sermitsiaq.gl-illu paasisai malillugit tamatumuuna Nicolaj Sørensenip sulianik ingerlatsisimanera akerlilerneqarluni.
Inatsisartut siulittaasuata Ruth Heilmannip, Siumut, uppernarsarpaa Nicolaj Sørensenip soraarniuteqarnera inatsisartut siulittaasoqarfiannit tusaatissatut tiguneqartoq.
Atorfik inuttaleqqinneqassanersoq qanittukkut inatsisartut siulittaasoqarfiata isummerfigissavaa, Ruth Heilmann oqarpoq.
- Inatsisartut inatsisartulu allattoqarfiata suleriaasiisa nutarterneqarnissaannut atatillugu siulittaasoqarfiup tamanna oqaluuserissavaa, Ruth Heilmann oqarpoq.