Nunat Avannarliit Killiit upalungaarsimaneq oqaluuseraat
Nunat Avannarliit killiit aalajangersimasumik qulequtalerlutik Savalimmiuni juunimi isumasioqatigiinnissaanni Atlantikup avannaani ulapungaarsimanissaq oqaluuserineqassaaq.
nunat Avannarliit killiit Siunnersuisoqatigiiffiat Savalimmiuni aalajangersimasumik qulequtaqarlutik juunip 5-8-ni 2008-mi isumasioqatigiissapput. Isumasioqatigiinnerup imarissavai Atlantikup avannaani annaassiniartarnermi upalungaarsimaneq aammalu nunat tamat akornanni annaassiniartarnerup pitsaanerulernissaanut siunissami qanoq ikkumaarnissaat oqaluuserineqassapput. Nunat avannarliit killiit ministerii inatsisartunilu ilaasortaat 50-t missaanniittut, imaatigut annaassiniarnermut pisortat aammalu Nunani Avannarlernit allaniit inatsisartuni ilaasortat, immikkut tamakkuninnga suliaqartut immikkullu ilisimasallit isumasioqatigiinnermi peqataassapput.
Nunat Avannarliit killiit Siunnersuisoqatigiivini siulittaasoq karl V. Matthíasson oqarpoq, matumani annaassiniarnermik sulinermi aammalu nunani taakkunani annaassiniarnissamut upalungaarsinerit pigineqartut pillugit Nunani Avannarlerni killerni isumaqatigiissutit ataqatigiissaarinerillu ataatsimoortumik takussutissiorneqarnissaat anguniarneqartoq. Taassuma aamma oqaatigaa, isumasioqatigiinnermi silaannaap allanngoriartorneranik suliassa unamminartut suuneri paasiniarneqassasut USA-llu tamaani annaassiniartarnermut tunngatillugu ikilisaanerannut tunngasut sammineqassasut.
Isumasioqatiginnermut atatillugu MRCC-Tórshavn aaqqissuussillunilu sungiusassaaq. Savalimmiuni Sakkutooqarfik, Islandip Sinerissamik nakkutilliisui kiisalu Savalimmiuni Islandimilu namminneq kajumissutsiminnik annaassiniartartut siullerpaamik sungiusaqatigiissapput. Nunami imaanilu annaassiniarnermi sungiusarnerit ingerlanneqassapput.
Nunat Avannarliit killiit Siunnersuisoqatigiit Kalaallit Nunaata Inatsisartuisa, Savalimmiut Lagtingiata Islandillu Altingiata akornanni pisortatigoortumik suleqatigiiffigaat. Siunnersuisoqatigiit siulittaasoqarfianniipput siulittaasoq Karl V. Matthíasson, Islandimi Altingimeersoq, siulittaasup tullii Kári P. Højgaard, Savalimmiuni Lagtingimmersoq aamma Ruth Heilmann, Kalaallit Nunaanni Landstingip siulittaasua.