Kammalaatinik atorfinitsitsisarneq atorneqarpoq

Kalaallit Nunaanni kammalaatinik atorfinitsitsisarneq atuuppoq, Ilisimatusarfimmiit misissuinerup tamanna uppernarsarpaa. Kisianni tassani qanoq atugaatiginera oqaatigineqanngilaq, KNR allappoq.

? Politisk dikterede ansættelser foregår i Grønland, men det gør de også i Randers kommune, siger lektor Pia Vedel Ankersen./Politikkikkut aalajangikkamik atorfinitsitsisarnerit Kalaallit Nunaanni atuupput, tamanna aamma Randersip kommuniani atorneqarpoq, Pia Vedel Ankersen oqarpoq.

Ilisimatusarfimmi Allaffissornikkut ilisimatusarnermut immikkoortortami lektori Pia Vedel Ankersen ilisimatusartut peqatigalugit misissuinermik ingerlatsisuusimavoq, taakku ilaatigut atorfillit qullersaanngitsut kinaassutsiminnik isertuusisut atorfinitsitsisoqassatillugu politikkikkut akuliuttoqartarnersoq aperineqarsimapput. Taamaattoqartarpoq, Pia Vedel Ankersen KNR-imut oqarpoq.

- Kammalaatigiiaarnermik taaneqarsinaasumik pisoqartarpoq. Apersukkatta ilaat oqarput, namminneq piffissaq sivisooq atorlugu atorfinittussamik piginnaaneqarluartumik toqqaaniartarlutik, taamaattoq allamik atorfinitsitsinissaq pillugu politikerit tungaaniit naalakkiummik takkuttoqarsinnaasarpoq, Pia Vedel Ankersen oqarpoq.

Kisianni kammalaatigiiaannerup qanoq atugaatiginera misissuinermi taaneqanngilaq.

- Taamatut pissusilersornerit assersuutigalugu aamma Randersip kommuniani innuttaassutsikkut Kalaallit Nunaanni innuttaasut amerlaqatigisaanni atorneqarput. Misissuinitsinni qanoq annertutigisumik atugaanera misissussallugu amigaatigaarput. Tamanna inuiaqatigiinni allani taamatut inuttutigisunut sanilliullugu Kalaallit Nunaanni atugaanerunerluni? Tamanna amigaatigaarput, kisianni taamaaliussagaanni qulequtaq pillugu annertunerusumik misissuinissamik pisariaqartitsissaaq, Pia Vedel Ankersen oqarpoq.

Taanna kammalaatigiiaanneq pillugu Ilimmarfimmi oqallitsitsinissami oqallinnissamut tunngavissamik saqqummiisunut ilaasussaavoq. Suliniaqatigiiffiup Tranparency International-ip - nunarsuaq tamakkerlugu akilersilluni peqquserluuteqartarnermik akiuiniarfiusuusup - danmarkimi immikkoortortaqarfiata Ilisimatusarfik suleqatigalugu ataatsimiinnissaq tamanut ammasuusoq aaqqissuutaraat.

Powered by Labrador CMS