Finn Lynge 75-iliivoq.
Atuakkiortoq, Europa-parlamentarikeri, inuiaqatigiinnik oqallissaarisartoq katuulerlu Fin Lynge, Narsaq, marlunngornermi 75-iliivoq.
Finn Lynge Nuummi inunngorpoq, nukappiaraalluni ilinniarnertuunngorniarluni Danmarkimut nuuppoq. Kingorna Københavns Universitet-imi qallunaatut franskisullu atuarpoq, aammalu Frankrigimi, Romami USA-milu ilinniarluni katuullinut palasinngorpoq.
Finn 1963-imi kalaallini siullersaalluni katuullit palasiattut ivertinneqarpoq. Tamatuma kingorna Danmarkimi Kalaallit Nunaannilu palasinut ikiortitut sulisimavoq, kisianni palasitut suliunnaarluni kalaallini inuiaqatigiinni arlalippassuarnik atorfeqartarlunilu Namminersornerusut sullissimallugit.
Finn Lynge ukiorpaalunni KNR-imi pisortasimavoq. Europa Parlamentimi Kalaallit Nunaata sinniisigaa 1979-imiit 1984-imut, aammalu 1993-imiit 1995-imut qallunaat nuaata nunanut allanut tunngasuni sullissiviani Kalaallit Nunaata sinniisaatut ministerråditut sulisimalluni.
1995-97-imi Bruxelles-imi qallunaat ambassade-qarfiani kalaallit nunaannut tunngasuni Minister Sekretær-iusimavoq. 1998-03-imut Kalaallit Nunaanni Namminersornerullutik Oqartussat Danmarkimi Immikkoortortaqarfiani siunnersortinut pisortaasimavoq. 2000-03-mi namminersorneq pillugu isumalioqatigiissitami kalaallit sinnerlugit ilaasortaalluni, Nunanut allanut sillimaniarnissamullu tunngasunut Suleqatigiissitaliaq akisussaaffigalugu.
Finn Lyngep suliarpassuisa ilaat siammasilluinnartumillu atuakkiarisarsimasai kinaassutsimut nunallu inoqqaavisa pinngortitap pisuussutaanik nujuartanik atuinissamut piginnaatitaaffiinut tunngasuupput.
Finn Lynge Verdensnaturfond-imut Sinniisoqarfimmut ilaasortaavoq aammalu Dansk Udenrigspolitiske Selskab-ip siulersuisuinut ilaasortaalluni.