Nunaqarfinni mekanikerit 8-t
Tele-p nunaqarfinni mekanikerit 8-t ilinniartillugit naammassitippai.
Nunaqarfinni mekanikerit arfineq-pingasut maanna ulluni apriilip 20-ianiit 26-ianut ulluni arfinilinni pikkorissareerlutik naammassipput, taamalu nunaqarfinni annikinnerusunik iluarsagassaqalertillugu sulisinnaalerlutik.
– Nunaqarfinni mekanikerinik ilinniartitsineq tamanut iluaqutaasussaavoq, nunaqarfinni innuttaasunut TELE-mullu. Siornatigut nunaqarfinni attaveqaatinik ajutoortoqaraangat teknikerinik illoqarfimmiit iluarsaassiartortussanik tikittoqarnissaa utaqqeqqaarneqartarsimavoq. Nunaqarfimmi mekanikerit maanna suliassat ilarujussui suliarisinnaalerpaat. Nunaqarfinni mekanikerit TELE-p suliassanut taaneqartunut annertuumik atorpai, taamalu nunaqarfinni mekanikerit suliaat pillugit tatigineqarlutillu nersualaarneqarlutik, Tele Post-imi paasissutissiinermut sulisoq Malînánguak M. Mølgaard tusagassiorfinnut nalunaarummi allappoq.
Nunaqarfinni mekanikerit tassapput: Emil Kristensen, Ikerasak, søren Knuthsen, Narsarsuaq, Lassinnguaq Mikaelsen, Arsuk, Filippus Sanimuinnaq, Isortoq, Paulus Christensen, Upv. Kujalleq, Magdalene O. Broberg, Naajat, Karl P. Karlsen, Nuussuaq, Johannes Jessen, Napasoq, Ilitsersuisoq/Pikkorissaasoq Lasse Hansen.