Parnaarussaanikkut ujarneqartut
Ilisimatuut kalaallit siusinnerusukkut parnaarussaasimasut Herstedvesterimi parnaarussivimmiinnerminni qanoq inuuneqarsimanerminnik oqaluttuarusuttunik pissarsiorput.
Norgemiu kriminologi Evy Frantzsen Nuummi assigiinngitsuni allagarsiinikkut Herstedvesterimi parnaarussaasimasunik taakkulu ilaqutaanik pissarsiorpoq. Taakkua misilittagaat misissuinermut ilaatinneqassapput, misissuineq kalaallit Herstedvesterimiittussanngorlugit pineqaatissinneqarsimasut nalunaarsorneqarnerat pillugu Evy Frantzsenip siusinnerusukkut ilisimatusaatigalugu suliaanut nangitsinerusussaavoq. Suliap ilaatigut takutippaa, Kalaallit Nunaanni piffissap ingerlanerani ikinnerpaamik inuit 113-it piffissamik killiligaanngitsumik pineqaatissinneqartarsimasut, qallunaat nutaanni inissiisarfinniittussanngortinneqartarsimallutik.
Neriuutigineqarpoq, pineqaatissinneqarnikuusimasut tamakku ilarpassui kinaassutsiminnik nalunaaratik misissuinermut namminersornerullutik oqartussanit tapiiffigineqarsimasumut peqataajumanissaat. Siunertarineqarpoq, parnaarussaaqqasimasut Herstedvesterimi parnaarussivimmiit Danmarkimi angerlarsimaffimmut anisinneqarnerisa kingorna inuunerisa qanoq ingerlasimanerisa paasisaqarfiginissaa.
– Sapinngisamik amerlanerpaat attaveqarfiginissaat neriuutigaarput. Aamma ilaqutaasut ataatamik angerlarsimaffimmit ungasissorsuarmi parnaarussaaqqanera aammalu Kalaallit Nunaannut uteqqinnerata kingorna qanoq issimanersoq immaqa oqaluttuarusussinnaasut, Evy Frantzsen sermitsiaq.gl-imut oqarpoq.
Taassuma erseqqissarpaa, Kalaallit Nunaanni matoqqasumik parnaarussiviliornissamik pilersaaruteqarnermut aammalu inissitat inuiaqatigiinnut aniseqqinnissaannut tunngatillugu pilersaarutinut atatillugu misissuinerup inernera soqutiginaateqarsinnaasoq. Misissuinermi maannakkut ingerlanneqartussami aamma Herstedvesterimi maannakkut inissinneqarsimasut apersorneqarnerannik ilaqartussaavoq, taakkualu tamarmik Evy Frantzsen naapertorlugu peqataanissartik kissaatigalugu nalunaarutigisimavaat.
Evy Frantzsen ikiortaalu Annemette Nyborg aallaqqaammut Nuummiinnaq pissarsiorniarput. Kisianni sinerissap sinneranut aamma angalanissaq isumaavoq. Aamma neriuutigaat, misissuinissartik pillugu nutaarsiassaq sinerissamut aamma siaruaakkumaartoq, peqataanissamut kissaateqartut tamaasa taamaalillugit attavigisinnaassagamikkit. Arnat taakku marluk qallunaatuinnaq oqaluttuupput, kisianni erseqqissarpaat, kalaallisut oqaloqatiginiarneqassagunik nutserisoqarnissamut periarfissaqartoq.
Evy Frantzseni evy.frantzsen@jur.ku.dk-mut allannikkut attavigineqarsinnaavoq. Atuagassiaq telefonnormutalik dokumenti talerpiatungaaniittoq download-erlugu pineqarsinnaavoq.