Uranimut tunngasoq Narsami innuttaasunut pingaaruteqarpoq
Innuttaasut 40 tikillugit amerlassusillit pingasunngornermi unnukkut silarlukkaluartoq urani Kuannersuillu oqallisigiartorpaat.
Ataatsimiinneq suliniaqatigiiffimmit naalagaaffimmut attuumassuteqanngitsumit (NGO) »Earth Charter Narsaq«-mit aaqqissuunneqarsimavoq. Unnummi oqallitsitsinermi siunertaavoq, inuinnaat Kuannersuarni uranimut aatsitassanillu piiaanissamut apeqqutit assortuussutaaqisullu pillugit apeqqutissaminnik nalornisaminnillu aniatitsisinnaanissaannik periarfissiinissaq.
Finn Lynge »Earth Charter Narsaq«-imeersoq naapertorlugu oqallinnermi qulaajarneqarpoq soqutisanik aporaattoqarlunilu nalilersuinerit assigiinngitsuusut. Siullertut ammaannartumi piiaasoqassatillugu innuttaasut peqqissusaasa avatangiisillu illersorneqarnissaannut periarfissat. Aappaattut paasissutissat innuttaasunut tunniunneqartartut tutsuiginassusiat kinaassusersiortuunngissusiallu. Pingajuattut najukkami inuttaasunut kalaallit nunaallu ataatsimut isigalugu aningaasarsiornikkut iluaqutissartai.
– Saqummiussisut tapersersuisortaqarlutillu akerliusortaqarput, aamma paasissutissat nutaat, nalilersuinerit paasissutissallu pineqartunut tunngasut saqqummiunneqarput, Finn Lynge ilisimatitsivoq.
Assersuutitut Nanortalimmiit paasissutissanik saqqummiussisoqarpoq, kuultisiorfik pinngortitamik illersuinissamut programeqaraluartoq Nalumani uuliamik eqqakkanillu mingutsitsisoqartoq, aammalu kuuit eqaloqarfiit ajorsillugit eqalueerunneqarsimasut.
Aamma saqqummiunneqarpoq, aatsitassanik piiaaffiup avatangiisinut sunniutai pillugit nalunaarusiortussaanerit suulluunniit Aatsitassanut Pisortaqarfimmut nassiunneqartartussaasut, tassuunaqqullugillu suut qanorlu ittut innuttaasunut saqqummiuneqartussaanersut aalajangerneqartarlutik. Periaaseq taanna arlaannaannulluunniit attuumassuteqanngitsuunissamik qularnaarinnittuunngilluinnartoq, ataatsimiinnermi erseqqissaavigineqarpoq.
Kulturikkut Illuummi A-21imi unnukkut oqallitsitsinermi najuuttunut ilaapput ikaarsaariarnermut ataatsimiitsitaliami ilaasortat arlallit, ulluni taakkunani illoqarfimmi ataatsimiissimasut.