Uppernarsaatissaqanngilaq
Immikkut ilisimasalinnit oqaaseqaatit killisiuinerillu Jonathan Motzfeldtimut unnerluussinissamut tunngaviusinnaasunik uppernarsaataasinnaasunik pissarsiviunngillat, politiit nalunaarput.
Jonathan Motzfeldtimut pasinniissusiisoqaranilu unnerluutiginnittoqassanngilaq. Taamak Kalaallit Nunaannut politimesteri Steen Silberg Thomsen naliliinerup kingorna inerniliivoq.
Kisianni Naalagaaffiup politiivisa misissuiartortittagaanik ikiortearluni misissuinerit takutippaat pineqaatissiissutaasinnaasunik pisoqarsimasinnaasoq, politimester Steen Silberg Thomsen ilisimatitsivoq.
– Misissuinerup unitsinneqarnissaa aalajangerpara. Taamaalilluni suliami unnerluutiginnittoqassanngilaq, suliarlu naammassisutut isigaarput, politimesteri oqarpoq.
Misissueqqissaarnermi arnat, suliassanngortinneqartut Jonarhan Motzfeldt aamma Jens Jakobseb ilisimannittullu arlallit killisiorneqarsimapput. Københavnimiit immikkut ilisimasalinniit pinerluttoqarsimasinnaaneranut teknikkikkut aammalu nakorsanillu misissuinerit inerlanneqarsimapput. Oqaatigineqarpoq, misissuinerup nalaani paasissutissanik suliassanngortitap unnerluutigineqarnissaanut tunngaviusinnaasunik pissarsisinnaasoqarsimanngitsoq.
– Suliap naammassisutut oqaatineqarnissaanut aalajangerninnut immikkut pingaartissimavara, misissuinermi suliassanngortitsisumiit suliassanngortitsinerminut tunngavigisaani nassuiaatitigut paasissutissanik atoqatigiinnikkut kannguttaatsuliornermut toqqaannartumik erseqqissunillu oqaatigineqarsinnaasimannginnerat. Aamma pingaartissimavara killisiuinerit suliamilu teknikkikkut uppernarsaatit suliassanngortitsinermut tunngatillugu naapertuutinngimmata, politimesteri oqarpoq.
Innuttaasunit angutit qarlii assorsuaq maluginiarneqarsimapput. Kisianni qarliit atisallu allat misissorneranni atoqatigiittoqarsimaneranut takussutissanik malunnartoqanngillat.
Arnap maanna politimesterip aalajangiiussaa Naalagaaffiup eqqartuussisuuneranut ingerlateqqissallugu pieriarfissaraa.