Perorsaasut naammagisimaarinnipput
Perorsaasut kattuffiata PIP akissarsiat oqaluttuarisaanermi 17 procentimik aatsaat taamaq qaffaateqartiginerat naammagisimaarpaat, KNR allappoq.
Perorsaasut isumaqatigiissummut kommunit kattuffiata Kanukokap, naalakkersuisut perorsaasussullu kattuffiata PIP-p akornanni isumaqatigiissutigisaannut nutaamut atatillugu pitsanngoriaatinik arlalinnik angusaqarput.
Akissarsiat 17 procentinik qaffariaateqarput. Taanna ilaatigut tunngaviusumik akissarsiatigut tapiliussatigullu qaffariaatitigut malunniutissaaq. Perorsaasut aamma perorsaasutut immikkut suliaqartuni Kalaallit Nunaanni siullersaallutik sulisunut 58-it sinnerlugit ukiulinnut seniordage-nik taasanik angusaqarput.
PIP siulittaasua Arliina Skifte KNR-imut oqarpoq, akissarsiatigut malunnartumik qaffaateqarneq perorsaasunik amerlanerusunik sulilersitsisinnaanissaa neriuutigigitsik, ilaatigut perorsaasut perorsaasutut akissarsiat appasippallaarnerat pissutigalugu piffissap ingerlanerani allanut suliffissarsiortariaqarsimasut.