Narsami angajoqqaat ataatsimiinneranni tapersersorneqarluarneq
Atuarfimmi siulersuisut pingasunngornermi angajoqqaanut ilisimatitsissutinik ataatsimiititsipput, ilaatigut ilinniartitsisussaaleqineq atuartullu Gladsaxe-mut angalanissaraluisa taamaatiinnarnerat.
Angajoqqaat ataatsimiinnermi peqataasut amerlaqaat, 65-it, Narsap kommunianiit oqartussaasuniit sinniisuutitat ikittuinnaat takkussimallutik, taamak atuarfimmi siulersuisuni siulittaasoq Jacqueline Laurseni siulittaasullu tullia Rie Oldenburg ilisimatitsipput.
- Atuarfimmi siulersuisut siulittaasuata sapaatip akunnerata siuliani borgmesterimik, aningaasaqarnermut ataatsimiititaliamik aammalu Meeqqanut Kulturimullu Ataatsimiitsitaliamik ataatsimeeqateqarsimaneq pillugu nassuiaateqarpoq. Pingaarnersiorlugu neriorsuutigineqarpoq ilinniartitsisussarsiortarnermut tunngatillugu pitsaanerulersinniarneqassasoq, suliniutilli annertunerusut soorlu ukiuni aalajangersimasuni atorfinitsitsisarnerit, sulinngiffeqarnermi akiliutitilluni angalasarnerit utaqqiisaagallartumillu inissiarineqartartut kommunerujussuanngortussap aningaasaqarnikkut pilersaarusiornissaanut innersuussutigineqarlutik, tassa ukiumi atuarfiusumi 2009/10-mi aatsaat aallertinneqarsinnaasut, taamak atuarfimmi siulersuisoqarfik allappoq.
Kommunalbestyrelsemiit ilaasortaq ataasiinnaq takkussimavoq, politikerit amerlanersaat borgmesterit kommunaldirektørillu Nuummi ataatsimiinnissaannut atatillugu aallararsimagamik.
Angajoqqaat 8. klassit Gladsaxe-mut atuariartortinneqarnissaasa piviusunngortinniarnissaat kaammattuutigaat.
- Paasissutissat saqqummiunneqartut tunngavigalugit paasinarsivoq, kommunalbestyrelsi paasissutissat pisoqalisimasut tunngavigalugit aalajangiisimagunartoq, Jacqueline Laursen aamma Rie Oldenburg allapput.
- Atuarfimmi siulersuisunut ataatsimiinneq manna assorsuaq qiimmaallaataasimavoq. Tamatuma takutippaa Narsap atuarfiani meeqqat atuartut angajoqqaavi peqataalluarlutillu soqutiginnittuusut. Atuarfimmi siulersuisut atuarfiullu aqutsisui pissutsit pitsanngortinniarlugit sulinermi kisimiinngillat, kisianni ajornartorsiutit pigineqartut pillugit tapersersorneqarlutillu paasineqarput, tamarmillu aaqqiivigineqarnissaat qilanaaralugu.
ataatsimiinneq una upernaamut kingusinnerusukkut sammisat taakku qulequtaralugit malitseqartinneqassaaq, angajoqqaat siunnersuutinut ilassutissanik isumassarsiatsialannillu ikiuukkusullutik kissaateqarmata, aammalu oqallissutigineqartut suli naammassineqanngilluinnarmata.