Ilimagisamit amerlanerusut ilinniarsimasuupput
Akuttunngitsumik oqaatigineqartarpoq, inuit sulisinnaasut pingajorarterutaannaat pisinnaaffiliinertalimmik ilinniarsimasuusut. Kisitsisit eqqortut minnerpaamik 42 procentiupput, suleqatigiissitaq naliliivoq.
Namminersornerullutik Oqartussat ataanni suleqatigiissitap nalunaarsorsimaffimmit paasussutissat tunngavigalugit paasivaat, 2004-mi januaarip 1-iata nallernerani innuttaasut akornanni 25-iniit 54-inut ukiullit akornanniittut 42 procentii pisinnaaffilersukkanik ilinniagaqarsimasuusut.
Kulturimut, Ilinniartitaanermut, Ilisimatusarnermut Ilageeqaarnermullu Naalakkersuisoqarfiup kalaallit Nunaanni Naatsorsueqqissaartarfik Danmarkimilu Naatsorsueqqissaartarfik suleqatigalugit ilinniagaqarnerup qaffasissusaata 2008-mi januaarip 1-ianiit misissuiffigineqarnissaa sulissutigilersimavaa.
Ilinniarsimassutsip qaffasissusaa pingaaruteqarpoq, assersuutigalugu nunatsinni aatsitassarsiorfiit amerlanerit imaluunniit aluminiumik aatsitsivissualiortoqassappat Kalaallit Nunaat qanoq piareersimatiginersoq nalilersussagaanni.