Maniitsumi atuarfimmik matusineq
Taarsiullugu Kuuttartup Atuarfia Kalaallit Nunaanni Piareersarfiit annersarilissavaat.
Ukioq atuarfiusoq nutaaq aggustimi aallartippat Maniitsumi meeqqanut atuarfik ullumikkutut marluunatik ataasinnanngorsimassaaq.
- Atuarfeeqqat Kuuttartup Atuarfia-ta atorunnaarsinnissaa Kommunalbestyrelsip aalajangerpaa, borgmester Søren Lyberth, Siumut, Sermitsiaq.gl-imut ilisimatitsivoq.
"Atuarfitsialak" malillugu 11. klaaseni atuartarneq atorunnaassaaq. Taamaattumik klasset soraarummeertussat aasamut marluussapput, taamaalilluni Maniitsumik atuarfiit marluk ingerlanneqarnissaannut atuartussatigut tunngavissaarutissaaq.
- Aasamut Maniitsumi atuarfiit annersaanni Atuarfik Kilaaseeqqami atuartut soraarummeertussat klasset arfinillit ataatsikkut atuarunnaarpata inissaqarlualertussaavugut, Søren Lyberth oqarpoq.
Tamanna pissutigalugu kommunalbestyrelsi aalajangerpoq, illoqarfimmi atuarfiup aappaa matuneqassasoq illoqarfiullu atuartuutai tamaasa ataatsimut atuartilerlugit. Tamaaliornikkut aamma ilinniartitsisut atuartitsisinnaalissapput, allaffissornermik suliaqarunnaarlutik.
Søren Lyberth oqarpoq, atuarfimmik matusineq ilinniarfinnik sipaarniarfiginninnermik tunngaveqanngitsoq, akerlianilli:
- Atuarfimmi matusineq kommunimut kingusinnerusukkut aningaasartuutaanerulissaaq, tassa kommunalbestyrelsep peqatigitillugu illoqarfimmi Piareersarfik Kuuttartup Atuarfianut nuunniarmagu.
- Taamaaliornikkut Piareersarfik marloriaatinngortinneqassaaq, taamalu Piareersarfiup Kalaallit Nunaanni annersanngortinneqarnera aningaasartuutitaqanngitsoorsinnaanngilaq, init atuartitsiviit 13-iussallutik, Søren Lyberth oqarpoq.
Kommunalbestyrelsep suleqatigiissitaliaq Piareersarfiup aasaanerani atuanngiffeqareernerup kingorna Kuuttartup atuarfianut nussimalerpat maanna atuuttup sumut atorneqarnissaanik misissuisussaq pilersissimavaa.
Suleqatigiissitaliap siunnersuusiani apriilimi saqqummiussinnaanissaa naatsorsuutigaa.