Nunarput issittumi teknologimi ilisimasanik pissarsissaaq
Center for Arktisk Teknologimi kalaallit ingeniørinngorniat ilinniartinneqarput teknikikkut ineriartornermi luaqutaasussat.
- Kalaallit nunaanni ingeniørinut suliassanngortitat - naak kalaallit nunaanni immikkut ilisimasallit pioreeraluartut - suliffeqarfinnut kalaallit nunaanninngaaneersuunngitsunut tunniunneqartarneri pillugit puullaaqineq Arktisk Teknologi-mi ingeniørinngorniarfimmit paasisinnaalluarparput.
Taamak oqarpoq Hans Peter Christensen Sanaartornermik Ilinniarfimmi Center for Arktisk Teknologi-mi aamma Danmarks Tekniske Universitet-imi ilinniartunik siunnersuisartoq oqarpoq.
- Issittumi teknologi-mi ingeniøritut ilinniarnerup siunertaasa pingaarnerit ilagaat kalaallit ingeniørinngorniat Kalaallit Nunaanni sulinissamut immikkut piukkunnarsarsimasut ilinniartinneqarnissaat. Tamannalu iluatsilluarsimavoq, Hans Peter taamak Kalaallit Nunaanni ingeniørit siunnersuisartut annersaanni InuPlan-imi pisortamut Kristian Lennert-imut oqaaseqaammini. Kristiaap qanittukkut ilisimatitsissutigaa InuPlan ingeniørinngornianik sungiusaatigalugu sulisussanik tigusisinnaanatik, ingeniørinit suliassat namminersornerullutik oqartussanit kommunillu ingeniørinut suliassanngortitat Danmarkimut tunniuttarmatigit.
Issittumi teknologi-mi ingeniørinngorniarfik ilinniarfiuvoq suli nutaajusoq, aamma ingeniørit maannamut ilinniakkaminnik naammassinnittartut pilerngunneqartarsimapput. Kalaallit Nunaanni aallaaveqartuni arfiniliusuni pingasut Kalaallit Nunaanni sulipput, marluk civilingeniørinngorniarlutik ingerlaqqipput ataaserlu naammasseqqammertoq kalaallit nunaanni suliffeqarfimmik attaveqarpoq.
Sinneruttunit arfineq-marluusunit naammassisimasunit qallunaat nunaanni aallaaveqartunit marluk pingasulluunniit Kalaallit Nunaanni sulipput. Issittumi ingeniørit Kalaallit Nunaanni sulinissartik kissaatigivippaat, Hans Peter Christensen erseqqissaavoq.
- Issittumi ingeniørinngorniat sungkiusaatigalugu sulinissami pilerigineqartuupput, sungiusaatigalugu suliffissatut neqeroorutit ilinniartunit amerlanerummata. Taamaakkaluartoq ARTEK-imi ilinniartut kalaallit arlallit nunani allani ingeniøritut sungiusaatigalugu sulinissartik toqqartarpaat, Kalaallit Nunaanni sulilernissartik naatsorsuutigigalugu silatusaarlutik sungiusaatigalugu sulinissartik nunani allani atorusuppaat, taamaalillutik nunat tamat akornanni sulinermik misilittagaqalersinnaagamik, Hans Peter Christensen oqarpoq, nangillunilu:
– Neriuutigaarput kalaallit nunaanni inuiaqatigiit Issittumik Teknologimi ingeniørinngorniarfiup Kalaallit Nunaannut iluaqutissamik ilinniartitsineranik kalaallit immikkut ilisimasaat atorluarumaaraat.